Amnesty International don call on Nigeria make dem investigate report say at least 150 people, most of dem pikin, don die inside one army camp for north-central Kwara state – but military say di report na lie.

Di victims na im be part of about 1,500 Fulani pipo wey dem move to Yikpata camp afta armed groups attack dem plenty times, Amnesty tok for Thursday.

“Instead of finding safety, dem face over-crowded and dirty condition, dem no fit move freely, bad hunger and sickness,” Amnesty tok inside one statement.

Military throway di death report. “No evidence to support dis kind allegation,” Major General Michael Onoja, wey be Director of Defence Media Operations, tell Reuters.

“I doubt am. Nothing like dis happen before,” e add.

Amnesty tok say dia researchers wey visit di camp for April talk to survivors wey yarn dem say hunger and sickness spread well well, with plenty dead body dem bury for one grave.

Security analysts don tok say communities dey face more pressure as Islamist militants from north dey push enter di region.