President Bola Tinubu don order security agents to track down and arrest di pipo wey kill oda pipo for Angwan Rukuba, Jos North Local Government Area, Plateau State, as e still comfort di families of di victims.

Dis serious incident happen on Palm Sunday wen suspected bandits attack one popular bar for di community, kill more dan 28 pipo and wound many oda pipo, according to Plateau State Police Command.

While e dey speak during town hall meeting wit key stakeholders for Jos, di state capital, Tinubu sympathize wit di families of di victims, e talk say no amount of money fit replace wetin dem don lose.

E talk: “Nothin wey I fit give una, even if e reach billions, but to comfort una and promise say dis kind tins no go repeat again. I know di pain… di pain and suffering wey dey una hearts. Only God fit give una joy and comfort. No money fit bring back wetin una don lose.”

Tinubu assure say di federal government go support di affected families and make sure justice dey served.

“As government, we go try our best to comfort una and work wit una. Di best solution be make justice dey done,” di President talk.

Di president still order security agents to track down and arrest di killers, e praise di quick response of police and military, e talk: “Una must find and arrest di killers. We no go allow dis kind wickedness to go without punishment.”

To make security strong for Plateau, Tinubu announce say Federal Government go deploy 5,000 Closed-Circuit Television (CCTV) cameras across di state to help gather intelligence, do surveillance, and respond quickly to security problems.

“We go install immediately network of cameras wey go help law enforcement agencies identify troublemakers instantly,” e talk.

Tinubu still tell di Minister of Humanitarian Affairs to compile data on all victims and wetin dem lose. “Even though human life no fit replace, we must see wetin support we fit give to all di families wey dis matter affect,” e emphasize.