Nigeria goment close mine, order investigation after 37 miners die for Plateau
Di wahala start when pipo from Zurak village go one abandon lead site wey get sulphuric oxide gas, dem no know say di gas dey dangerous.
Nigeria goment through di Ministry of Solid Minerals Development wey Dele Alake dey head, don order di immediate closure of Mining Licence 11810 for Zurak area for Plateau State. Dis one come after 37 pipo die because dem inhale poison gas while dey mine for one abandon pit.
Di wahala start when pipo from di village go one abandon lead site wey get sulphuric oxide gas, dem no know say di gas dey dangerous. As dem dey try take di mineral, dem begin cough di poison gas, and many of dem die.
Di Minister, Dr Dele Alake, don call di Governor of Plateau State, Caleb Mutfwang, to show say heart dey pain am well well for di innocent pipo wey die just dey find way make dem chop. He tell di Governor make e tell di pipo of Wase say di govment dey with dem for dis hard time.
To find out wetin really cause dis kain tori, di Minister don send high-power investigation team wey di Ministry Permanent Secretary, Engr. Yusuf Yabo, go lead. Di team get officers and experts for mining, environment, and artisanal mining matters. Alake self dey monitor di matter make sure say everything done well.
From wetin we dey hear so far, di mining company wey get di place don give di community chance to mine for di area because di villagers dey beg make dem get work. But di place na old lead mining site, and di mineral wey dey inside fit produce sulphuric oxide gas. Di pipo no know say di gas dangerous, so dem just go in and begin inhale am.
Di Minister tok say make we no worry, dem go give us more news as di investigation go on. And e promise say di Federal Govment go do everything to make sure say dis kain wahala no happen again for any mining community for Nigeria.