Suspected Lakurawa terrorists don carry out attack for Dadinkowa community, wey dey Maiyama Local Government Area for Kebbi State inside north west Nigeria.

Dem attack mosque on Wednesday evening while worshippers dey observe prayer, dem just open fire anyhow.

According to local sources, dis attack na di latest assault on Muslims wey dey fast. Di terrorists kill six worshippers and injure three oda pipo.

Wey confirm di matter, Bashir Usman, wey be Police Public Relations Officer for Kebbi State, tok say dis attack na revenge because dem don clash wit Army before.

E yarn say: "Di attack na reprisal by suspected Lakurawa terrorist elements, because dem don fail for dia attempt to ambush troops wey dey under 8 Division."

According to am, di whole mata start on February 24, when di General Officer Commanding, GOC, of 8 Division, wey be Major General Bemgha Koughna, dey go visit hin frontline troops wey dey di state. Di GOC convoy, as dem dey pass inside forest near Maiyama Hill, armed terrorists wey be Lakurawa members attack dem wit heavy gunfire.

But di soldiers show dem say na who sabi fight pass. Dem engage di attackers for serious gun duel, and dem kill five of dem, so di ambush no work.

Usman add say for di mosque attack, five worshippers die from gunshot wounds, while three oda pipo get injuries wey dem carry go hospital for treatment.

But local sources tok say six pipo actually die for di attack, and dem don bury dem according to Islamic rites.