Nigeria goment ban mining close to any bridge for di kontri
Minister of Works David Umahi say di decision na to make bridges strong and maintain road safety.
Di Works Minister, Senator David Umahi, say President Ahmed Tinubu goment don give order to stop any kain mining work wey dey happen near bridges across di kontri.
Di ban dey consider 10 kilometre radius of di bridges wey dey for every state for Nigeria.
Umahi tell journalists for Enugu afta im go check some projects for southeast, say dis order follow di Federal Executive Council decision to make bridges strong and keep road safety intact.
E warn say make people obey, because government go use patrol boats waka around bridge areas and give two motors to police to monitor highway.
Di Minister also praise President Tinubu sense, talk about how dem dey handle Enugu-Onitsha road wahala and say dem go finish dat road by April 28.
E even talk say President Tinubu na like di Biafra wey southeast people dey find, because of all di projects wey dey done and dem still do for di area.