Nigeria don begin 18-month plan wey go modernise di kontri population data system and strengthen national geospatial and population data system, ready for di upcoming Population and Housing Census.

Dis plan na to help census readiness and make public decision-making better, wey go boost Nigeria geospatial database, improve census preparation, evidence-based planning, and oda development goals.

Di Chairman of National Population Commission (NPC), Dr. Aminu Yusuf, tok dis one for high-level meeting wey dem organise for Abuja, in collaboration with United Nations and University of Southampton WorldPop programme. E talk about di need to put current, correct, integrated, and useful data systems as Nigeria dey prepare for di next Population and Housing Census.

E explain say modern geospatial database na key part of national planning architecture. If dem develop am well and use am responsibly, e go help census operation, health planning, education delivery, infrastructure targeting, disaster preparedness, agricultural strategy, local governance, and oda public priorities.

For im own talk, di UN Population Fund (UNFPA) Nigeria Representative, Muriel Mafico, tok say Population and Housing Census (PHC) data dey very important for good governance, economic planning, national development, and informed decision-making.

Mafico add say updated PHC data dey key to help national planning and di government Renewed Hope Agenda, and also to check progress for goals like SDGs and Africa Agenda 2063.