Tinubu call soldiers wey die for Borno attack ‘heroes wey Nigeria no go forget’

Presido Bola Tinubu of Nigeria say e dey sad for di loss of di brave soldiers of 29 Task Force Brigade, Operation HADIN KAI, wey die for terrorist attack wey happen for dia camp for Benisheikh, Borno State.

Di President also send im condolences to di military and di families of di soldiers, and e tell dem make dem no lose heart for dis bad loss.

Defence Headquarters confam di attack and di death of di soldiers, wey happen for early morning of Thursday, April 9, 2026.

President Tinubu praise di courage and heroism of di soldiers wey fight well-well to push back di terrorists and make sure Boko Haram no fit overrun di villages wey di soldiers dey protect.

As e dey mourn di death of di brave soldiers, di President tell di leaders of Armed Forces and all soldiers for frontline make dem no give up, but make dem take strength from how Nigeria people really appreciate dia sacrifice.

E tok say: “From di reports wey I get, our armed forces don dey do strong, non-stop attack from ground and air against di insurgents, wey don kill many of dia fighters and commanders. Di way di insurgents dey attack back na sign say dem don dey desperate.
“I send my condolences to di families of our brave soldiers, wey follow Brigadier-General Oseni Omoh Braimah, wey give dia life to defend our country for Borno State today.

“Di government go never forget wetin dem do. Dia sacrifice no go waste. Because of di courage and dedication of our troops for frontline, our mind to defeat terrorism and all kinds of violence for Nigeria don strong pass before.

“I tell di Military High Command and our troops for all di places wey dem dey fight: Make una no lose heart, make una no tire, make una no give up.

“Our officers and soldiers must continue to serve with honour, courage, and love for dia country. Di government go always support di Armed Forces, give dem more of di equipment wey dem need, and make sure all di people wey risk dia life for our safety dey okay.”