Pope Leo XIV for Thursday talk say Turkey dey play serious role for now and for di future of di Mediterranean area and even di whole world. E praise di country because dem dey value all di different kinds of people wey dey inside dia country.

Di Pope wey na also di head of Vatican, talk am for where im and Turkish President, Recep Tayyip Erdogan, dey for capital Ankara. Im say, "Di picture of di bridge for Dardanelles Strait, wey dem choose as sign for my journey, dey show clear clear say your country get special work to do."

Pope Leo com hammer say di different tribes and people for Turkey na one of dia main power. Im talk say before na even bridge for Asia and Europe, "dis bridge first dey connect Turkey to imsef."

Im talk say na real society dey build on top "bridges wey dey join people together," especially as many countries for di world dey quarrel because of different harsh opinions wey dey tear dem apart.

Im stress am say all di different areas and identities for di country na "crossroads of sensibilities," and if everybody become di same, na to make di country poor.

Di Pope still talk say di Christian people for Turkey wan help build di country well. Im talk say: "Christians wan contribute good thing to make your country united." Im talk say dem "be, and dey feel, say dem na part of Turkish identity."

Pope still mention say family matter still strong for Turkey. Im talk say, "Family still get strong value for Turkish culture pass many oda countries," and government dey support am with many programmes.

Turkey work as Bridge

Di Pope talk say im dey hope say Turkey go continue to be country wey dey bring peace for dat area. Im pray say: "Make Turkey be source of stability and make am bring people together, so we fit get better peace."

Im remind people say four Pope wey come before am—Paul VI, John Paul II, Benedict XVI, and Francis—don visit Turkey. Dat one show say Vatican "no just dey friend with Turkey, but dem wan cooperate build better world with di help of dis country wey be bridge between East and West, between Asia and Europe, and where cultures and religions dey meet."

Di Pope com add say: "Di reason wey I come visit, to mark 1,700 years since Council of Nicaea, and di fact say di first eight important church meetings wey ever hold, happen for inside di land wey be Turkey today, all dey talk to us about meeting and dialogue."