Di Senate for Nigeria go hold emergency meeting for Tuesday as many pipo dey vex about how dem handle di changes to Electoral Act.

Di one wey cause pass na how dem remove di part wey talk say make dem use electronic system send election results as e dey happen live.

Na for inside one week wey dem just pass di 2026 Electoral Act Amendment Bill dis emergency meeting dey happen. Pressure don full ground from civil society groups, opposition pipo, labour unions, professional bodies, regional leaders, and plenty youths wey don carry dia anger go National Assembly gate.

Senate President, Senator Godswill Akpabio, go lead di meeting wey all di 105 senators wey remain go attend.

For di last six months, di Senate don lose two members — Senator Okechukwu Ezea of Enugu State and Senator Godiya Akwashiki of Nasarawa State — dem don die. One oda senator, Jimoh Ibrahim, just leave chamber afta President Bola Tinubu appoint am as ambassador. Because of all dis, di number of senators don reduce from 109 to 106.

Dem announce di emergency meeting for Sunday through statement wey Clerk of di Senate, Emmanuel Odo, sign.
"Di Senate President, Godswill Akpabio, don order say make Senate reconvene for emergency sitting on Tuesday, February 10, 2026," di statement talk.

Dem plan to start di meeting by 12 noon.