Guddoomiyaha Golaha Sare ee Kumeelgaarka ah ee Suudaan, Abdel Fattah al-Burhan, ayaa Isniintii gaaray caasimadda Riyaad, Boqortooyada Sacuudi Carabiya isagoo ku jooga booqasho rasmi ah.
Arrintan ayaa ku soo beegmaysa xilli Ciidamada Qalabka Sida ee Suudaan (SAF), oo uu hoggaamiyo Burhan, ay dagaal kula jiraan maleeshiyada RSF, kaasoo socda in ka badan labo sano.
Wakaaladda wararka dowladda Sacuudi Carabiya, SPA, ayaa soo werisay imaanshaha al-Burhan, iyada oo aan faahfaahin ka bixin ajendaha wadahadallada uu la yeelanayo boqortooyada. Si kastaba ha ahaatee, al-Burhan ayaa la kulmay Amiir Maxamed bin Salmaan si ay uga wada hadlaan xaaladihii ugu dambeeyey ee dalka uu dagaalku halakeeyey.
Boqortooyada Sacuudi Carabiya ayaa ka mid ah bahda dhexdhexaadinta caalamiga ah ee lagu magacaabo 'Quad', oo ay sidoo kale xubno ka yihiin dalalka Maraykanka, Masar iyo Imaaraatka Carabta, iyagoo bishii Sebtembar soo jeediyey qorshe dalka Suudaan looga hirgelinayo xabbad-joojin bani'aadannimo oo ku muddeysan saddex bilood. Arrintan ayaa loo arkaa tallaabada koowaad ee lagu gaari karo xabbad-joojin joogto ah iyo marxalad kala-guur ah oo sagaal bilood ah oo lagu gaaro dowlad madani ah oo madax-bannaan.
Dagaalka u dhexeeya ciidamada Suudaan iyo RSF, oo billowday Abriil 2023, ayaa tan iyo markaas sababay dhimashada kumanaan qof, halka malaayiin kalena ay ku barakaceen.
