Wasiirka Gaashaandhigga Suudaan, Hassan Daoud Kabroun, ayaa Arbacadii in ka badan 20 dal ku eedeeyay inay ku lug leeyihiin dagaalka dalka ka socda, iyagoo Ciidamada Gurmadka Degdegga ah (RSF) siiya taageero saadka, dhaqaale, calooshood-u-shaqeystayaal iyo diyaaradaha aan duuliyaha lahayn.
Wasiirka oo la hadlay Wakaaladda Wararka Suudaan ma magacaabin dalalka uu eedeynayo, balse wuxuu sheegay in dagaalka socda uusan ahayn dagaal sokeeye ama loollan awoodeed, balse uu yahay dagaal lagu doonayo burburinta Suudaan, dhaca kheyraadkeeda iyo beddelidda qaab-dhismeedka dadkeeda.
Ciidamada Suudaan iyo RSF ayaa dagaallamayay tan iyo bishii Abriil 2023, markii khilaaf ku saabsan mideynta ciidamada uu isu beddelay dagaal. Colaadda ayaa sababtay dhimashada tobannaan kun oo qof iyo barakaca ku dhawaad 13 milyan oo qof, iyadoo ay sii xumaanayaan xaaladaha macluusha iyo dhibaatada bani’aadannimo ee dalka ka jirta.
Dhanka kale, Kabroun ayaa sheegay in Suudaan ay tahay dal muhiim ah oo aan laga reebi karin qorshayaasha amniga gobolka iyo kuwa Afrika, isla markaana ay dooneyso inay ku biirto isbahaysiga amniga Badda Cas. Wuxuu xusay in Suudaan ay leedahay xeeb dhererkeedu yahay qiyaastii 800 oo kiiloomitir.
Sacuudiga ayaa 30-kii Luulyo 2026 ku dhawaaqay dhismaha isbahaysi lagu ilaalinayo isu-socodka maraakiibta, ganacsiga iyo sahayda tamarta ee Badda Cas, Gacanka Cadmeed iyo Marinka Baabul-Mandab.
Wasaaradda Gaashaandhigga Sacuudiga ayaa 13-kii Agoosto sheegtay in 15 dal ay saxiixeen bayaanka aasaaska isbahaysiga, halka 13 dal ay dhammaystireen habraacyada ku biirista.
Wasiirka ayaa sidoo kale sheegay in Suudaan ay ku hareereysan yihiin dalal Afrikaan ah oo wajahaya caqabado amni oo ay ka mid yihiin faafitaanka hubka, tahriibinta, ka ganacsiga dadka iyo dhaqdhaqaaqyada fallaagada.
Wuxuu tilmaamay in khatarahan xuduudaha isaga gudba ay si toos ah u saameeyaan amniga Suudaan, isagoo intaas ku daray in dagaalka socda uu carqaladeeyay hawlgalladii ciidamada wadajirka ah ee hore ee isku dubbaridi jiray amniga Suudaan iyo dalalka deriska ah.
