Shabakadda Dhaqaatiirta Suudaan ayaa Talaadadii ku eedeysay Ciidamada RSF inay xabsi ku hayaan 20 dhakhtar magaalada Al-Fashir, oo ah caasimadda Gobolka Waqooyiga Daarfuur.
Bayaan ay soo saartay Sudan Doctors Network ayaa lagu sheegay in warbixin ay diyaariyeen xubnaheeda ka hawlgala Waqooyiga Daarfuur ay muujisay in shaqaalaha caafimaadka ee gobolka ay la kulmeen weerarro baahsan intii u dhexeysay 15-kii Abriil 2023 ilaa 26-dii Oktoobar 2025, markaas oo RSF ay la wareegtay magaalada.
Shabakaddu waxay sheegtay in muddadaas la dilay 25 ka mid ah shaqaalaha caafimaadka.
“Waxaa magaalada Al-Fashir lagu xiray ku dhowaad 20 dhakhtar, oo ay ku jiraan afar haween ah, mana jiro wax war ah oo laga hayo halka ay ku sugan yihiin tan iyo markii RSF ay la wareegtay magaalada,” ayaa lagu yiri bayaanka.
Ururka ayaa sheegay in waayidda tiradan shaqaalaha caafimaadka ah ay “dharbaaxo weyn ku tahay waaxda caafimaadka ee Waqooyiga Daarfuur.”
Waxay ugu baaqeen RSF inay shaaciso halka ay ku sugan yihiin dhakhaatiirta la xiray ee ku sugan Al-Fashir, isla markaana ay u oggolaato shaqaalaha caafimaadka inay gutaan waajibaadkooda iyagoo ka badqaba “bartilmaameedyo iyo xadgudubyo.”
Sida ay sheegeen hay’ado maxalli ah iyo kuwo caalami ah, RSF ayaa la wareegtay gacan ku haynta magaalada Al-Fashir 26-diii Oktoobar ee sannadkii hore, iyadoo tallaabadaas ay la socdeen eedeymo la xiriira xasuuqyo loo geystay shacabka rayidka ah iyo digniino muujinaya inay sii qoto dheereyn karto kala qaybsanaanta juqraafiyeed ee Suudaan.
Suudaan waxaa tan iyo Abriil 2023 ragaadiyay dagaal u dhexeeya ciidamada dowladda iyo RSF, kaas oo ka dhashay muran ku saabsanaa qorshaha loogu dhex darayay ciidamada RSF militariga dalka. Colaaddaasi waxay sababtay mid ka mid ah dhibaatooyinka bani’aadannimo ee ugu daran dunida, iyadoo ay ku dhinteen tobannaan kun oo qof, isla markaana ku barakaceen ku dhowaad 13 milyan oo qof.
