Siddeed gabdhood oo arday ah, kuwaas oo lagu eedeeyay inay sababeen dab ka kacay hoyga ardayda oo ay ku dhinteen 16 gabdhood oo ay isku dugsi ahaayeen oo dhigta Utumishi Girls Academy, ayaa Arbacadii iska fogeeyay eedeymaha dilka ee loo soo jeediyay, iyagoo ka soo muuqday maxkamad ku taalla Kenya.
Carruurtan aan qaangaarka ahayn ayaa la horgeeyay Garsoore Diana Kavedza oo ka tirsan Maxkamadda Sare ee Kibera, magaalada Nairobi, halkaas oo ay ku diideen 16 dacwadood oo dil ah oo la xiriira dabkii ka kacay dugsiga 28-dii May ee magaalada Gilgil, oo qiyaastii 118 kiiloomitir (73 mayl) waqooyi-galbeed kaga beegan caasimadda Nairobi.
Bilowgii dhageysiga dacwadda, Garsoore Kavedza ayaa ku adkaysatay in carruurtan aan loogu yeerin “eedeysane.”
“Qofna yuusan ugu yeerin eedeysane. Halkan kuma lihin eedeysane. Kuwani waa carruur, waxaana ugu yeeri doonnaa carruurta dacwaddu khusayso,” ayay tiri.
Iyadoo akhrinaysay eedeymaha, Garsooruhu waxay sheegtay in “carruurta dacwaddu khusayso lagu soo oogay dacwad dil ah.”
Gabdhaha ayaa diiday eedeymaha, waxayna qirteen inaanay wax dembi ah gelin. Kadibna maxkamaddu waxay amartay in lagu sii hayo Xarunta Xannaanada Carruurta ee Kabete (Kabete Juvenile Remand Home) ilaa 22-ka Sebtembar, markaas oo dacwadda mar kale dib loo dhageysan doono.
Dabkan oo ahaa masiibooyinkii ugu dhimashada badnaa ee ka dhaca dugsiyada Kenya sannadihii u dambeeyay, ayaa sababay dhimashada 16 arday iyo dhaawaca 79 kale, wuxuuna dalka ka dhaliyay dood ballaaran oo ku saabsan heerarka badbaadada ee dugsiyada hoyga leh.
Garsoore Kavedza ayaa sidoo kale amartay in carruurta la siiyo la-talin nafsiyeed iyo taageero dhinaca caafimaadka maskaxda ah inta ay xabsiga ku jiraan, isla markaana laga mamnuuco isticmaalka baraha bulshada inta dacwaddu socoto.
Maxkamaddu waxay sidoo kale caddeysay in saxafiyiinta haysta aqoonsiga rasmiga ah loo oggolaan doono inay tabiyaan dacwadda, balse waa in aan la shaacin ama la aqoonsan karin carruurta ku lugta leh.
“Wariyeyaasha la aqoonsan yahay waxay ka qayb geli karaan oo ka warbixin karaan dhammaan fadhiyada maxkamadda ee dadweynaha u furan. Warbixinnadu waa inay noqdaan kuwo caddaalad ah, sax ah, kuna koobnaada habsami u socodka dacwadda, go’aannada maxkamadda, iyo arrimaha danta guud,” ayay maxkamaddu sheegtay.
“Wax warbixin, daabacaad ama baahin ah looma oggola inay si toos ah ama si dadban u aqoonsato mid ka mid ah carruurta dacwaddu khusayso.”
Baarayaasha ayaa ku andacoonaya in dabka si ula kac ah looga dhex shiday hoyga ardayda ee dugsiga, inkastoo duruufaha saxda ah ee dabka dhaliyay ay weli yihiin kuwo ay maxkamaddu baaritaankooda waddo.
Xafiiska Agaasimaha Guud ee Dacwad-oogista Dadweynaha ayaa ansixiyay 16-ka dacwadood ee dilka ah ee lagu soo oogay gabdhaha, kadib baaritaanno ay sameeyeen Hay’adda Dembi-baarista Kenya (Directorate of Criminal Investigations).
Masiibadii ka dhacday Utumishi Girls Academy ayaa mar kale soo nooleysay walaaca laga qabo dababka soo noqnoqda ee ka dhaca dugsiyada Kenya, kuwaas oo sannadihii la soo dhaafay sababay dhimasho, dhaawac iyo burbur hantiyeed oo baaxad leh, gaar ahaan dugsiyada hoyga leh.
