Ra’iisul Wasaaraha Soomaaliya, Mudane Xamsa Cabdi Barre, ayaa Sabtidii xafiiskiisa ku qaabilay Danjiraha Jamhuuriyadda Shacabka Shiinaha u fadhiya Soomaaliya, Mudane Wang Yu, iyagoo yeeshay wada-hadallo heer sare ah oo lagu xoojinayo iskaashiga istaraatiijiyadeed ee u dhexeeya labada dal. Kulanka ayaa diiradda lagu saaray dardargelinta iskaashiga dhinacyada muhiimka ah, oo ay ka mid yihiin amniga, ganacsiga, iyo kaabayaasha dhaqaalaha, iyadoo la adkeynayo xiriirka taariikhiga ah ee ka dhexeeya Muqdisho iyo Beijing.
Intii lagu jiray wada-hadallada, Ra’iisul Wasaare Xamsa ayaa xusay sida ay Dowladda Federaalka uga go’an tahay horumarinta xiriirka diblomaasiyadeed si loo gaaro danaha wadajirka ah. Wuxuu tilmaamay in xoojinta xiriirka lala leeyahay saaxiibbo caalami ah oo muhiim ah sida Shiinaha ay lagama maarmaan u tahay xilli uu dalku ku jiro marxalad xasaasi ah oo la xiriirta sugidda amniga iyo soo kabashada dhaqaalaha. Ra’iisul Wasaaruhu wuxuu uga mahadceliyay dowladda Shiinaha taageerada joogtada ah ee ay u hayso midnimada, madaxbannaanida iyo wadajirka dhuleed ee Soomaaliya, taas oo ah tiir muhiim u ah xiriirka labada dal.
Danjire Wang Yu ayaa dhankiisa mar kale adkeeyay sida ay Beijing uga go’an tahay sii wadista iyo ballaarinta xiriirka saaxiibtinimo ee ay la leedahay Soomaaliya. Wuxuu Ra’iisul Wasaaraha u xaqiijiyay in Shiinuhu qorsheynayo inuu kordhiyo taageerada uu siiyo Dowladda Federaalka, gaar ahaan dhinacyada kaalmada amniga, maalgashiga tooska ah, iyo mashaariicda horumarinta dhaqaalaha. Danjiruhu wuxuu sheegay in Shiinuhu u arko Soomaaliya saaxiib muhiim ah oo ku yaalla Geeska Afrika, isla markaana uu doonayo in xiriirku keeno natiijooyin wax ku ool ah oo u faa’iideeya labada shacab.
Kulanka ayaa ku soo dhammaaday Ra’iisul Wasaare Xamsa oo bogaadiyay doorka muuqda ee Shiinaha ku leeyahay dib-u-dhiska kaabayaasha dhaqaalaha Soomaaliya iyo bixinta gargaarka bani’aadamnimo ee joogtada ah. Labada dhinac ayaa isku raacay inay sii wadaan isgaarsiinta dhow si loo hubiyo hirgelinta degdegga ah ee qodobadii laga wada hadlay.
