Taliyaha Ciidanka Xoogga Dalka Soomaaliyeed, Sarreeye Gaas Ibraahim Maxamed Maxamuud, ayaa kormeer ku tagay saldhigga ciidamada gaarka ah ee Danab ee magaalada Dhuusamareeb, halkaas oo dhismaha saldhiggu uu marayo heer gabagabo ah.
Taliyaha Ciidanka ayaa xarunta waxaa ku soo dhaweeyay saraakiil sare oo uu hoggaaminayay Gaashaanle Sare Maxamed Bashiir Sheekh Aligood Barqadle, Taliyaha Guutada 16-aad ee Danab, gaar ahaan Ururka 163-aad. Intii uu socday kormeerka, taliyaha ayaa warbixin ka dhageystay saraakiisha maamulaysa mashruuca oo ku saabsan horumarka dhismaha iyo howlaha ka socda xerada.
Sarreeye Gaas Ibraahim Maxamed Maxamuud ayaa sidoo kale la hadlay ciidamada Ururka 163-aad ee Guutada 16-aad ee Danab, isagoo ku boorriyay inay xoojiyaan gudashada waajibaadkooda qaran isla markaana dardargeliyaan howlgalada ka dhanka ah argagixisada Al-Shabaab. Wuxuu ciidamada ku ammaanay naf-hurnimadooda, geesinimadooda, iyo feejignaantooda joogtada ah ee ay kaga hortagayaan khataraha cadowga.
Taliyaha Ciidanka ayaa carrabka ku adkeeyay in xaruntan cusub ee militarigu ay door weyn ka qaadan doonto kor u qaadidda awoodda howlgal iyo diyaar-garowga ciidamada Danab iyo guud ahaan Ciidanka Xoogga Dalka Soomaaliyeed. Wuxuu dib u xaqiijiyay sida Dowladda Federaalka uga go’an tahay taageeridda iyo xoojinta ciidamada qalabka sida ee dalka.
Mas’uuliyiinta kormeeraya dhismaha ayaa sheegay in mashruucu uu marayo heerarkiisii ugu dambeeyay isla markaana la filayo in si rasmi ah loo soo gabagabeeyo mustaqbalka dhow.
