Dowladda Federaalka Soomaaliya iyo Jamhuuriyadda Dadka Shiinaha ayaa kala saxiixday heshiis taariikhi ah oo u oggolaanaya wax-soo-saarka kalluumeysiga Soomaaliya inuu canshuur la’aan ku galo suuqa Shiinaha, taasoo noqotay tallaabo muhiim ah oo lagu xoojinayo iskaashiga dhaqaale ee labada dal iyo horumarinta dhaqaalaha buluugga ah ee Soomaaliya.

Heshiiska ayaa Isniintii waxaa kala saxiixday Wasiirka Kalluumeysiga iyo Dhaqaalaha Buluugga ah ee Jamhuuriyadda Federaalka Soomaaliya, Axmed Xassan Aadan, iyo Safiirka Jamhuuriyadda Dadka Shiinaha u fadhiya Soomaaliya, Wang Yu.

Heshiiskan cusub ayaa la filayaa inuu furo fursado waaweyn oo u soo kordha waaxda kalluumeysiga Soomaaliya, isagoo siinaya wax-soo-saarka kalluunka iyo cuntooyinka badda ee Soomaaliya marin ganacsi oo mudnaan leh oo uu ku galo mid ka mid ah suuqyada ugu waaweyn ee macaamiisha dunida. Waxaa sidoo kale la filayaa inuu kordhiyo dhoofinta kalluunka iyo wax-soo-saarka badda ee tayada sare leh, sare u qaado dakhliga lacagaha qalaad, isla markaana abuuro fursado shaqo oo ka jira dhammaan silsiladda qiimaha ee waaxda kalluumeysiga.

Mas’uuliyiintu waxay sidoo kale sheegeen in heshiiskan uu dhiirrigelin doono maalgashi dheeraad ah oo lagu sameeyo warshadaha farsamaynta kalluunka, kaabeyaasha keydinta qabowga (cold-chain) iyo warshadaha kale ee qiime-ku-darrida lagu kordhiyo, taasoo sare u qaadi doonta tartanka waaxda kalluumeysiga Soomaaliya.

Iyagoo ka hadlayay muhiimadda heshiiska, labada dhinac waxay mar kale xaqiijiyeen sida ay uga go’an tahay ballaarinta iskaashiga dhaqaale iyo horumarinta ganacsiga faa’iida wadaagga ah. Waxay sheegeen in hindisahan uu ka tarjumayo iskaashiga sii xoogeysanaya ee Soomaaliya iyo Shiinaha iyo himiladooda wadajirka ah ee taageeridda horumar dhaqaale oo waara iyo hagaajinta nolosha bulshooyinka Soomaaliyeed ee ku tiirsan kalluumeysiga.

Heshiiska oggolaanaya in wax-soo-saarka kalluumeysiga Soomaaliya uu canshuur la’aan ku galo suuqa Shiinaha ayaa loo arkaa tallaabo weyn oo lagu horumarinayo istaraatiijiyadda dhaqaalaha buluugga ah ee Soomaaliya, iyadoo la xoojinayo kobaca, tartanka caalamiga ah iyo horumar waara oo muddo dheer ah oo ay gaarto waaxda kalluumeysigu.