Taliyaha Ciidanka Xoogga Dalka Soomaaliyeed, Sareeye Guuto Ibraahim Maxamed Maxamuud, ayaa si rasmi ah u furay shir ay isugu yimaadeen taliyeyaasha sirdoonka ee dalalka xubnaha ka ah Ururka Bulshada Bariga Afrika (EAC), kaas oo loo qorsheeyay inuu socdo inta u dhexeysa 29-30 Abriil 2026.
Shirka ayaa diiradda lagu saaray qiimeynta xaaladda amni ee dalalka Bariga Afrika iyo guud ahaan gobolka, iyadoo ka qeybgalayaashu ka doodayeen caqabadaha jira iyo sida loo xoojin karo iskaashiga dhinaca sirdoonka.
Khudbaddiisa furitaanka, Taliyaha ayaa ka hadlay xaaladda amniga ee Soomaaliya, isbeddellada ballaaran ee gobolka, iyo muhiimadda ay leedahay iskaashiga sirdoonka. Waxa uu sidoo kale iftiimiyay horumarka laga sameeyay dib u habaynta iyo soo kabashada Ciidanka Xoogga Dalka Soomaaliyeed.
Ugu dambeyntii, wuxuu u mahadceliyay wafdiyada ka qeybgalaya shirka, isagoo muujiyay rajada ah in kulankan uu keeni doono natiijooyin wax ku ool ah oo muuqda.
