Mid ka mid ah masuuliyiinta maaliyadda ee Al-Shabaab oo lagu dilay duqeyn ka dhacday Soomaaliya

Hay’adda Nabad-sugidda iyo Sirdoonka Qaranka Soomaaliya (NISA) ayaa Talaadadii sheegtay in ay duqeyn cirka ah ku dishay taliye sare oo ka tirsan Al-Shabaab, kaddib howlgal lagu beegsaday kooxda argagixisada ah oo ka dhacay magaalada Kuunyo Barrow ee gobolka Shabeellaha Hoose.

Hay’addu waxay sheegtay in ninka la dilay uu yahay Cabdullaahi Xasan Cabdi Cosoble, oo loo yaqaanay “Cabdullaahi Wadaad,” kuna tilmaantay inuu ahaa mas’uulka guud ee maaliyadda Al-Shabaab.

NISA ayaa sheegtay in Wadaad uu masuul ka ahaa ururinta lacago baad ah iyo maareynta dhaqaale sharci-darro ah oo laga qaadi jiray shacabka Soomaaliyeed.

Howlgalka ayaa lagu fuliyay iskaashi ay la sameeyeen saaxiibada caalamiga ah ee dhanka amniga, sida lagu sheegay bayaan ka soo baxay NISA.

Dowladda oo xoojisay dagaalka ka dhanka ah argagixisada

Cabdullaahi Wadaad ayaa sidoo kale hoggaaminayay waxa loogu yeero “cutubka canshuuraha” ee Al-Shabaab ee gobollada Shabeellaha Hoose iyo Banaadir, wuxuuna ahaa qof si weyn loogu yaqaanay tacaddiyada ka dhanka ah ganacsatada iyo shacabka, ayaa lagu yiri bayaanka.

Kooxda argagixisada ah ee xiriirka la leh Al-Qaacida ayaa in ka badan 16 sano weerarro ka waday Soomaaliya, iyadoo si joogto ah u beegsan jirtay ciidamada amniga, mas’uuliyiinta iyo rayidka.

Tan iyo bishii Luulyo ee sannadkii hore, Ciidanka Xoogga Dalka Soomaaliyeed, oo taageero ka helaya Howlgalka Taageerada iyo Xasilinta Midowga Afrika ee Soomaaliya (AUSSOM) iyo saaxiibbo caalami ah oo kale, ayaa xoojiyay howlgallada ka dhanka ah Al-Shabaab.

Mandate-ka howlgalka Midowga Afrika ayaa Golaha Ammaanka ee Qaramada Midoobay cusbooneysiiyay bishii Diseembar, iyadoo qaraar ay taageertay Boqortooyada Ingiriiska lagu kordhiyay oggolaanshihiisa ilaa 31-ka Diseembar 2026.