Wasaaradda Difaaca Turkiga ayaa si adag u cambaareysay howlgallada milateri ee Israa’iil ay ka waddo dalalka Falastiin, Suuriya iyo Lubnaan, iyadoo ka digtay in tallaabooyinkaasi ay dhaawacayaan xasilloonida gobolka, isla markaana ay meel-ka-dhac ku yihiin madax-bannaanida dhuleed ee dalalka deriska ah.
Afhayeenka Wasaaradda Difaaca Turkiga, Rear Admiral Zeki Aktürk, oo ka hadlayay shirkiisa jaraa'id ee toddobaadlaha ah, ayaa sheegay in Israa’iil ay sii waddo waxa uu ku tilmaamay “argagixisada deegaameystayaasha sharci-darrada ah” ee ka dhanka ah shacabka Falastiin.
Wuxuu sidoo kale xusay in ficillada Israa’iil ay wax u dhimayaan maqaamka taariikheed iyo kan sharciyeed ee goobaha barakeysan ee Muslimiinta ee Qudusta Bari.
Aktürk ayaa hoosta ka xariiqay in siyaasadaha Israa’iil aysan khatar ku ahayn oo keliya nabadda iyo amniga Bariga Dhexe, balse ay sidoo kale dhaawacayaan xasilloonida caalamka iyo kalsoonidii lagu qabay sharciga caalamiga ah.
Wuxuu beesha caalamka ugu baaqay inay qaaddo tallaabooyin wax-ku-ool ah oo lagu joojinayo waxa ay Ankara ku tilmaantay siyaasadaha ballaarinta iyo xasuuqa ee Israa’iil.
Ankara oo beenisay warar ku saabsan xubno ajnabi ah oo ka tirsan SDF
Dhinaca kale, Wasaaradda Difaaca Turkiga ayaa ganafka ku dhufatay warar sheegaya in dagaalyahanno ajnabi ah oo ka tirsan kooxda SDF ee ay hoggaamiso YPG ay isaga baxayaan Suuriya, qaarkoodna ay u gudbi doonaan gudaha Turkiga.
Wasaaraddu waxay caddeysay inay si dhow ula socoto geeddi-socodka lagu ilaalinayo midnimada dhuleed ee Suuriya, iyadoo ku dhegan mabda’a ah “hal dowlad, iyo hal ciidan”. “Wararka sheegaya in xubno ajnabi ah oo ka tirsan SDF ay Suuriya ka baxayaan, qaarna ay Turkiga imaanayaan, waa kuwo aan sal iyo raad toona lahayn,” ayay wasaaraddu tiri, iyadoo shacabka ugu baaqday inay ku kalsoonaadaan oo keliya xogaha rasmiga ah ee dowladda.
Turkiga iyo Suuriya oo dhammeystiray buundadii labaad ee sabbaysa
Afhayeenka ayaa sidoo kale sheegay in ciidamada Turkiga iyo kuwa Suuriya ay sii wadaan dadaallada wadajirka ah ee lagu xoojinayo xasilloonida iyo dib-u-soo-celinta nolol maalmeedkii caadiga ahaa ee dalkaas.
Waxaa la shaaciyay in 30-kii Agoosto ay ciidamada labada dal si wadajir ah u dhammeystireen dhismaha buundadii labaad ee sabbaysa oo laga dul taagay Webiga Furaat. Buundadan cusub ayaa beddeleysa marin hore oo ay daadad burburiyeen, waxaana loogu talagalay inay fududeyso isku-socodka dadka iyo gaadiidka labada dhinac ee webiga.
Tababarka duuliyeyaasha Eurofighter oo bilaabanaya 7-da Sebteembar
Wasaaradda ayaa dhanka kale xaqiijisay in wadahadallada iyo hanaanka iibka diyaaradaha dagaalka ee Eurofighter Typhoon ay si habsami leh ugala socdaan Boqortooyada Ingiriiska (UK), si loo daboolo baahiyaha hawlgal ee Ciidanka Cirka Turkiga.
Duuliyeyaasha Turkiga ayaa bishii Agoosto billaabay tababarradii hordhaca ahaa. Duuliyeyaashii soo dhammeystay tababarka eray-bixinta farsamada ayaa la filayaa inay 7-da Sebteembar 2026 si rasmi ah u billaabaan tababarka duulimaadka. Tababarkan ayaa socon doona muddo siddeed bilood ah, waxaana xigi doona saddex bilood oo dheeraad ah oo ah tababarka macallinnimada duulimaadka.
Taageerada dib u soo furashada markab lagu qabsaday Soomaaliya
War-saxaafadeedka ayaa sidoo kale lagu soo qaaday markab dhawaan ay burcad-badeed ku qabsadeen biyaha badda Soomaaliya. Wasaaradda ayaa sheegtay in Turkigu uu taageero farsamo iyo mid hawlgalba siiyay hay’adaha amniga Soomaaliya.
Hawlgal guuleystay oo ay fuliyeen ciidamada badda Soomaaliya kadib, burcad-badeedda ayaa isaga baxay markabka, waxaana si nabadgelyo ah gacanta loogu soo dhigay markabkii la afduubtay.
Iskaashiga saddex geesoodka ah: Turkiga, Pakistan iyo Sacuudi Carabiya
Ugu dambeyn, wasaaradda ayaa faahfaahin dheeraad ah ka bixisay iskaashiga difaaca ee u dhexeeya waddamada Turkiga, Pakistan iyo Sacuudi Carabiya. Wasiirrada Gaashaandhigga, kuwa Arrimaha Dibadda, iyo Taliyeyaasha guud ee ciidamada saddexda dal ayaa 31-kii Agoosto ku shiray magaalada Istanbul si ay u qaabeeyaan iskaashigan.
Qodobada lagu heshiiyay waxaa ka mid ah:
Xoghayn Guud: In dalka Sacuudi Carabiya laga hirgeliyo xoghayn guud oo hoggaamisa iskaashiga.
Hoggaan Meerto ah: Xilka xoghayaha guud inuu noqdo mid meerto ah, iyadoo Pakistan ay qaban doonto saddexda sano ee ugu horreysa.
Hawlgal Wadajir ah: In la badiyo dhoolatusyada iyo tababarrada ciidan ee wadajirka ah.
Warshadaha Difaaca: In la iska kaashado wax-soo-saarka saanadda milateri, horumarinta tiknoolajiyadda, iyo is-weydaarsiga khibradaha ciidan.
