Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa maanta qado sharaf u sameeyay xubnaha Madasha Mustaqbalka ee ka jawaabay martiqaadkii ay Dowladda fidisay 19-kii Janaayo 2026.

Kulanka qadada ayaa wuxuu qayb ka yahay kulamada hordhaca ah ee loo gogol xaarayo Shirka Wadatashiga Qaran ee soo socda oo ay isugu yeertay Dowladda Federaalka. Hindisahan waxa uu ujeedkiisu yahay in la xoojiyo wadahadal loo dhan yahay oo ku saabsan mudnaanta qaran ee muhiimka ah.

Doodaha kulanka ayaa diiradda lagu saaray xaaladda guud ee dalka, oo ay ku jiraan geeddi-socodka doorashooyinka, xoojinta midnimada iyo wadajirka shacabka Soomaaliyeed, wax ka qabashada xaaladaha abaarta ee taagan, iyo dardargelinta dagaalka ka dhanka ah Khawaarijta.

Madaxweynaha ayaa adkeeyay muhiimada wadatashi ballaaran iyo masuuliyad wadajir ah oo lagu wajahayo caqabadaha siyaasadeed, amni iyo bani’aadamnimo ee dalka.

Kulanka waxaa ka qeyb galay Ra’iisul Wasaaraha Dowladda Federaalka Soomaaliya, Mudane Xamza Cabdi Barre, xubno ka tirsan golaha wasiirrada, iyo wakiillo kala duwan oo ka socday Madasha Mustaqbalka.

Kulankan wuxuu ka tarjumayaa sida ay Dowladda uga go’an tahay wadahadal, isku duubni qaran, iyo dadaallo isku duuban oo lagu hormarinayo xasilloonida iyo dhismaha dowladnimada.