Wasiir Ku-xigeenka Arrimaha Dibadda iyo Iskaashiga Caalamiga ah ee Dawladda Federaalka Soomaaliya, Xasan Maxamed Cali (Nadaara), ayaa Axaddii furay Shirka Talagelinta Hoggaamiyeyaasha Qurbo-joogta Soomaaliyeed oo soconaya muddo saddex maalmood ah, kaas oo uu soo qabanqaabiyey Xafiiska Ra’iisul Wasaaraha oo kaashanaya Waaxda Arrimaha Qurbo-joogta ee Wasaaradda. Waxaa sidoo kale goobta joogay Xoghayaha Joogtada ah ee Wasaaradda, Xamza Aadan Xaadow.
Shirka ayaa isu keenaya 30 hoggaamiye oo ka socda qurbo-joogta Soomaaliyeed ee Yurub, Waqooyiga Ameerika, Bariga Dhexe iyo Afrika, iyo wakiillo ka socda hay’adaha federaalka, si loo diyaariyo Qorshe-hawleedka Talagelinta Qurbo-joogta, kaas oo aqoonta, xiriirrada iyo maalgashiga Soomaalida dibadda ku nool la waafajinayo Qorshaha Isbeddelka Qaranka 2025–2029. Xafiiska Ra’iisul Wasaaraha ayaa hoggaaminaya dhinaca farsamada, iyadoo taageero laga helayo Waaxda Arrimaha Qurbo-joogta ee Wasaaradda Arrimaha Dibadda iyo Iskaashiga Caalamiga ah.
