Wasiirka Gaashaandhigga ee Jamhuuriyadda Federaalka Soomaaliya, Axmed Macallin Fiqi, oo booqasho rasmi ah ku jooga Jamhuuriyadda Islaamiga ah ee Pakistan isaga oo hoggaaminaya wafdi heer sare ah, ayaa Arbacadii booqday xarunta Global Industrial & Defence Solutions (GIDS) iyo Jaamacadda Difaaca Qaranka ee Pakistan (NDU).
Xarunta GIDS, Wasiirka iyo wafdigiisa waxaa ku soo dhaweeyey Agaasimaha Guud ee shirkadda, Asad Kamal, oo warbixin ka siiyey awoodaha shirkadda ee dhinacyada wax-soo-saarka difaaca, tiknoolajiyadda milatariga iyo xalalka casriga ah ee difaaca. Labada dhinac ayaa sidoo kale ka wada hadlay fursadaha lagu xoojin karo iskaashiga warshadaha difaaca, horumarinta awoodaha milatari, iyo sida Soomaaliya uga faa’iidaysan karto khibradda GIDS iyo tiknoolajiyadeeda casriga ah ee difaaca.
Wasiirka ayaa sidoo kale booqday Jaamacadda Difaaca Qaranka ee Pakistan, halkaas oo uu ku soo dhaweeyey Guddoomiyaha Jaamacadda, Sarreeye Guud Babar Iftikhar. Intii ay booqashadu socotay, Wasiirka waxaa la siiyey warbixin ku saabsan doorka Jaamacaddu ka qaadato waxbarashada sare ee difaaca, daraasaadka istaraatiijiga ah, cilmi-baarista amniga iyo horumarinta hoggaanka sare ee ciidamada.
Wasiirka waxaa booqashooyinka ku weheliyey Safiirka Jamhuuriyadda Federaalka Soomaaliya u fadhiya Pakistan, Sheekh Nuur Maxamed Xasan, iyo Taliyeyaasha Ciidanka Badda iyo Ciidanka Cirka ee Ciidanka Xoogga Dalka Soomaaliyeed.
