Wasaaradda Gaashaandhigga Turkiga ayaa xaqiijisay in lix diyaaradood oo nooca dagaalka ee F-16 ah iyo nidaamyo difaac hawada ah loo diray Jamhuuriyadda Turkiga ee Waqooyiga Qubrus (TRNC).
Go’aankan ayaa qayb ka ah qorshe amni oo la xoojinayo TRNC, kaas oo si tartiib tartiib ah loo fulinayo iyadoo uu socdo dagaalka ka socda Bariga Dhexe.
Wasaaraddu waxay sheegtay in diristu ay timid “iyadoo la tixraacayo isbedelladii ugu dambeeyay ee ka dhacay gobolka,” iyadoo tallaabooyin dheeraad ah la qaadi doono haddii loo arko inay lagama maarmaan tahay kuwaasoo lagu salaynayo dhacdooyinka xiga.
Bayaankan ka soo baxay wasaaradda ayaa xoojiyay muhiimadda ay leedahay in la adkeeyo ammaanka bulshada Turkiga ee Qubrus iyadoo xiisadaha gobolka ay sii kordhayaan.
“Tallaabooyin dheeraad ah ayaa sii socon doona iyadoo lagu salaynayo isbedellada dambe, haddii loo arko inay lagama maarmaan tahay,” ayay lagu yiri bayaanka wasaaradda.
Go’aanka ayaa yimid kadib warar sheegaya xasillooni darro sii kordheysa oo ka jirta Bariga Mediterranean-ka, taas oo lala xiriirinayo dagaalka Israa’iil iyo Maraykanku ay ku qaadeen Iiraan iyo khataraha ka dhalan kara ee ku fidi kara gobolka, oo ay ku jirto gantaal Iiraan ay dhawaan ridday oo la qabtay ka hor inta uusan gelin hawada Turkiga.
Jasiiradda Qubrus ayaa waxaa ku yaal saldhig ciidan oo Ingiriisku leeyahay.
Jamhuuriyadda Turkiga ee Waqooyiga Qubrus (TRNC), oo la aasaasay 1983-dii islamarkaana uu aqoonsan yahay Turkigu, ayaa muddo dheer martigelisay ciidamada Turkiga iyadoo Ankara ay leedahay doorka dammaanad qaad ee ku xusan Heshiiskii Dammaanadda ee 1960-kii.
