Wasiirka Arrimaha Dibadda iyo Iskaashiga Caalamiga ah ee Jamhuuriyadda Federaalka Soomaaliya, Mudane Cabdisalaan Cabdi Cali, ayaa Talaadadii booqday xarunta Hay’adda Maareynta Musiibooyinka Soomaaliyeed (SODMA) ee Muqdisho, halkaas oo uu ku qaabilay Guddoomiyaha Hay’adda, Mudane Maxamuud Macallin Cabdulle.
Intii ay socotay booqashadu, Wasiirka ayaa kormeeray nidaamyada digniinta hordhaca ah iyo la socodka bani’aadamnimo ee SODMA, isagoo ku ammaanay hay’adda shaqadeeda wax ku oolka ah ee ka jawaabidda xaaladaha abaarta iyo taageeridda bulshada nugul ee ay saameeyeen dhibaatooyinka la xiriira isbeddelka cimilada.
Wasiir Cabdisalaan ayaa carrabka ku adkeeyay baahida loo qabo hannaan isku-duwid qaran oo mideysan si loo dardargeliyo dadaallada gurmadka loona sii xoojiyo iskaashiga lala leeyahay la-hawlgalayaasha caalamiga ah si loo ilaaliyo loona badbaadiyo nolosha muwaadiniinta Soomaaliyeed ee khatarta ku jira.
Wuxuu sidoo kale ugu baaqay Soomaalida ku nool gudaha iyo dibadda inay muujiyaan midnimo qaran isla markaana si firfircoon uga qeyb qaataan howlaha gurmadka iyo samatabbixinta ee socda, isagoo xusay in tallaabo wadajir ahi ay muhiim u tahay wax ka qabashada saameynta bani’aadamnimo ee ka dhalata abaaraha soo noqnoqda.
