Boqolaal dibadbaxayaal ah ayaa isugu soo baxay afaafka hore ee xarunta Baarlamaanka dalka Australia, si ay uga soo horjeestaan booqashada rasmiga ah ee uu dalkaas ku joogo Madaxweynaha Israa’iil, Isaac Herzog. Dibadbaxan ayaa waxaa barbar socday cadaadis siyaasadeed oo xooggan oo la saarayo dowladda Australia, kaas oo la xiriira dagaalka Qaza iyo dilkii shaqaalihii gargaarka.
Banaanbaxa oo ay hareeyeen calammada Falastiin, waxaa kasoo muuqday xildhibaanno iyo siyaasiyiin caan ah oo uu kamid yahay Senator David Pocock iyo hoggaamiyaha xisbiga Greens-ka, Larissa Waters.
Xildhibaanad Zali Steggall ayaa iyaduna fursaddan u isticmaashay in ay dowladda ka dalbato isla-xisaabtan dhab ah oo ku aaddan dilkii Zomi Frankcom, oo ahayd samafale u dhalatay Australia oo ku geeriyootay duqeyn ay Israa’iil ka fulisay Qaza bishii Abriil ee 2024-kii.
Ra’iisul Wasaaraha Australia, Anthony Albanese, ayaa sheegay inuu arrinta geerida Zomi Frankcom si toos ah ugala hadlay Madaxweyne Herzog, isaga oo caddeeyay in Canberra ay fileyso daah-furnaan buuxda inta baaritaannadu socdaan.
"Waxaan sii wadi doonnaa inaan cadaadis ku saarno in la helo isla-xisaabtan buuxa, oo ay ku jirto in la soo ooggo dacwado dambiyeed haddii ay ku habboon yihiin," ayuu yiri Albanese.
Booqashada Herzog oo qaadanaysa afar maalmood ayaa waxaa hareeyay xiisado kacsan. Warbaahinta ayaa si weyn u faafisay muuqaallo muujinaya booliska gobolka New South Wales oo xoog ku kicinaya dad Muslimiin ah oo tukanayay, tallaabadaas oo dhalisay caro weyn.
Golaha Imaamyada Qaranka Australia ayaa dhacdadaas ku tilmaamay "mid argagax leh oo aan la aqbali karin," halka Ergayga Gaarka ah ee Australia u qaabilsan la-dagaallanka Islaam-nacaybka, Aftab Malik, uu ku baaqay in raalligelin rasmi ah laga bixiyo falkaas.
Xaaladda Guud
Booqashadan ayaa kusoo beegmaysa xilli ay Qaza ka jirto xaalad bini'aadannimo oo aad u daran. Wasaaradda Caafimaadka Qaza ayaa xaqiijisay in tirada dhimashadu ay dhaaftay 72,000 oo qof, halka dhaawacu uu ka badan yahay 171,000.
Inkastoo ay jirto xabbad-joojin, haddana duqeymaha Israa’iil ayaa sii socda, iyadoo lagu eedeeyay inay jabisay heshiisyada caalamiga ah.
Ammaanka Madaxweyne Herzog ayaa si weyn loo adkeeyay, iyada oo ay ilaalinayaan ciidamo isugu jira boolis, ilaalo gaar ah oo Israa’iili ah, iyo toogteyaal (snipers), inta uu ku guda jiro socdaalkiisa.
