Iiraan oo gantaallo ku garaacday Israa’iil iyo saldhigyada Mareykanka ee Khaliijka
Tehran ayaa weeraradeeda aargoosiga ah ku beegsatay Israa’iil iyo xarumo Mareykanku ku leeyahay dalalka Baxreyn, Qatar iyo Imaaraadka Carabta, iyadoo xiisaddu ka sii darayso kadib weerarradii lagu qaaday Iiraan.
Iiraan ayaa gantaallo aargoosi ah ku garaacday xarumo milatari oo Mareykanku ku leeyahay Bariga Dhexe, iyadoo weerarka ugu daran lagu soo waramayo inuu ku dhacay xarunta Ciidanka Badda Mareykanka ee ku taalla Baxreyn.
Wakaaladda Wararka Baxreyn ayaa xaqiijisay in uu gantaal ku dhacay xarunta adeegga ee ee Ciidanka badda Mareykanka oo ku taalla aagga dekedda Juffair/Mina Salman ee dalka Baxreyn.
“Xarunta Adeegga ee Saldhigga 5-aad ee Ciidanka Mareykanka ayaa lagu qaaday weerar gantaal. Faahfaahinta dib ayaan ka soo sheegi doonnaa,” ayaa lagu yiri bayaan ka soo baxay Xarunta Isgaarsiinta Qaranka ee Baxreyn.
Taliska Dhexe ee Mareykanka (CENTCOM), oo mas’uul ka ah gobolka Bariga Dhexe, ayaan weli soo saarin wax bayaan ah oo ku saabsan khasaaraha ama dhimashada.
Iiraan ayaa sidoo kale gantaallada riddada dheer ku weerartay Israa’iil, iyadoo la sheegay in nidaamyada difaaca Israa’iil ay qabteen gantaalladaas.
Saldhigyada Mareykanka ee Bariga Dhexe oo wajahaya hanjabaad gantaallo
Weerarradan ayaa imanaya iyagoo jawaab toos ah u ah duqeymihii ay Israa’iil subaxnimadii ku qaadday Tehran iyo bartilmaameedyo kale oo ah gudaha Iiraan, kuwaas oo si degdeg ah ay ugu biireen ciidamada Mareykanka iyagoo hoos imanaya “Operation Epic Fury,” sida ay shaacisay Wasaaradda Gaashaandhiggu.
Mas’uuliyiinta Iiraan ayaa si isdaba joog ah uga digayay in weerar kasta oo lagu qaado dhulkooda uu keeni doono aargoosi lagu qaado saldhigyada Mareykanka ee dalalka dariska ah.
Gantaallo kale oo laga soo riday Iiraan ayaa lagu beegsaday goobo kale oo ay ciidamada Mareykanku ka deggan yihiin gobolka.
Mas’uuliyiinta Qatar ayaa xaqiijiyay inay qabteen laba gantaal oo ay soo ridday Iiraan oo kusoo wajahnaa hawadooda, halkaas oo uu ku yaallo saldhigga weyn ee Al-Cudeyd, oo ah xarunta hoggaanka Ciidanka Cirka Mareykanka iyo xerada in ka badan 10,000 askari.
Qaraxyo iyo uuro ayaa sidoo kale laga soo sheegay magaalada Abu Dhabi ee Isutagga Imaaraadka Carabta, taasoo sababtay in si degdeg ah loo xiro hawada. Imaaraadka ayaa martigeliya saldhigga istaraatiijiga ah ee ciidanka cirka ee Al Dhafra oo ay adeegsadaan ciidamada Mareykanka.
Codka digniinta ayaa laga maqlay caasimadda Urdun ee Cammaan, iyadoo warar lagu baahiyay baraha bulshada ay sheegayaan in gantaallo lagu weeraray goobo u dhow xarumo Mareykanku ku leeyahay Cammaan.
Dhanka kale, Kuweyt iyo dalal kale oo Khaliijka ah oo ay ku sugan yihiin ciidamada Mareykanka ayaa soo saaray amarro la mid ah oo dadka lagu farayo inay hoygooda ku nagaadaan.