Madaxweyne Geelle oo xarigga ka jaray in ka badan 1,000 guri
Madaxweyne Geelle ayaa ku sifeeyey guryahan cusub “tallaabo kale oo loo qaaday dadaalka dalku ugu jiro in hoyga laga dhigo muhiimadda koowaad.”
Madaxweynaha Jamhuuriyadda Jabuuti, Ismaaciil Cumar Geelle, ayaa Isniintii xarigga ka jaray in ka badan 1,000 guri oo ah nooca guryaha dadweynaha, kuwaas oo qayb ka ah qorshaha qaran ee lagu ballaarinayo helitaanka hoy jaban oo tayo leh.
Wajiga koowaad ee barnaamijkan ayaa ka kooban 520 guri oo midkiiba leeyahay saddex qol oo jiif ah, kuwaas oo ku yaalla dhismaha cusub ee PK13 ee degmada Balbala.
Guryahan oo ay dawladdu leedahay, loona qoondeeyey qoysaska aan haysan hoy ama mulkiyad dhul, ayaa waxaa dhismahooda iska kaashaday dawladda Jabuuti iyo Boqortooyada Sucuudiga.
Dhismahan ayaa ka kooban 26 dhisme oo wata goobo loogu talagalay in ay carruurtu ku cayaaraan iyo fagaarayaal bulshadu isugu timaado.
Madaxweyne Geelle ayaa ku sifeeyey guryahan cusub “tallaabo kale oo loo qaaday dadaalka dalku ugu jiro in hoyga laga dhigo muhiimadda koowaad.”
Wajiga labaad oo laga hirgeliyey deegaanka Shabellé ayaa lagu daray 500 oo guri oo min laba qol ah, kuwaas oo la dhisay iyadoo la kaashanayo dalka Shiinaha, taas oo wadarta guud ee guryaha cusub ka dhigaysa in ka badan 1,000 guri.
Xafladda furitaanka ayaa waxaa goob-joog ahaa madaxda sare ee dalka, oo ay ka mid yihiin Ra’iisul Wasaare Cabdillaahi Kaamil Maxamed, Wasiirka Horumarinta Magaalada iyo Guriyeynta Aamina Cabdi Aden, Guddoomiyaha Golaha Qaranka Dileita Mohamed Dileita, iyo Marwada Koowaad ee dalka, Khadiija Maxamuud Xayd.