Madaxweynaha Jamhuuriyadda Jabuuti, Ismaaciil Cumar Geelle, ayaa mar kale loo doortay muddo xileedkiisii lixaad kadib markii natiijooyinka rasmiga ah ay muujiyeen inuu helay 97.81% codadka doorashadii Jimcaha.
Doorashadan ayuu wajahay hal musharrax oo kaliya, Maxamed Faarax Samatar, oo hore uga tirsanaa xisbiga talada haya iyadoo ururrada mucaaradka ahi ay inta badan qaadacaan doorashooyinka, iyagoo ku andacoonaya xaddidaad ku saabsan xorriyadaha siyaasadeed.
Dowladdu waxay beenisay eedeymaha ku saabsan xadgudubyo ballaaran waxayna diiday dhaleeceynta habka doorashada.
Geelle, oo 78 jir ah, ayaa hoggaaminayay dalkan ku yaal Geeska Afrika tan iyo 1999-kii, markaas oo uu xilka kala wareegay Xasan Guuleed Abtidoon, madaxweynihii ugu horreeyey ee Jamhuuriyadda Jabuuti.
Bishii Oktoobar ee la soo dhaafay, baarlamaanka ayaa u codeeyay in la tirtiro xadka da’da 75 sano ee musharraxiinta madaxweynaha, sidoo kale wuxuu meesha ka saaray aftidii horey loogu baahnaa si loo ansixiyo dastuur cusub.
Xadka da’da ayaa markii hore uu dejiyay Geelle sannadkii 2010-kii, taasoo qayb ka ahayd isbeddello ay ku jirtay in la tirtiro xadka tirada muddo xileedyada madaxweynaha, isla markaana la yareeyo muddada oo laga dhigo hal muddo xileed oo laga dhigay lix sano ilaa shan sano.
