Wasiir Ku-xigeenka Gaashaandhigga Xukuumadda Federaalka Soomaaliya, Idris Cismaan Xaaji Cali, ayaa ka qaybgalay Kulankii 36-aad ee Hay’adaha Siyaasadda ee Ciidanka Heeganka Bariga Afrika (EASF), kaas oo lagu soo gabagabeeyay magaalada Kampala ee Jamhuuriyadda Uganda.
Kulankan ayaa waxaa isugu yimid Guddiga Taliyeyaasha Ciidamada Difaaca iyo Golaha Wasiirrada Gaashaandhigga. Kulamada waxaa diiradda lagu saaray dib-u-eegista howlaha EASF, qiimeynta xaaladda amni ee gobolka, xoojinta iskaashiga dhinacyada difaaca iyo amniga, iyo ansixinta qorshaha shaqo ee hay’adda inta ka harsan sannadka 2026.
Kulankan ayaa sidoo kale soo dhoweeyay horumarka laga sameeyay xaaladda amni ee Suudaan iyo dadaallada dib-u-kabashada. Waxaa la isku raacay in Jamhuuriyadda Suudaan ay sannadka 2027 la wareegto guddoominta Ciidanka Heeganka Bariga Afrika.
Wafdiga Soomaaliya waxaa sidoo kale ka mid ahaa Gaashaanle Sare Axmed Maxamed Xassan, oo wakiil ka ahaa Taliyaha Ciidamada Qalabka Sida ee Soomaaliyeed, iyo Fardowsa Maxamed Qanyare, Safiirka Jamhuuriyadda Federaalka Soomaaliya u fadhiya Jamhuuriyadda Uganda.
