Wasiirka Maaliyadda Xukuumadda Federaalka Soomaaliya, Biixi Imaan Cige, iyo wafdi uu hoggaaminayo oo dhowaan gaaray magaalada Washington D.C ee dalka Mareykanka, ayaa kulan miro-dhal ah la yeeshay Madaxweyne Ku-xigeenka Bangiga Adduunka ee dalalka Bariga iyo Koonfurta Afrika, Ndiame Diop.

Wafdiga Wasiirka ayaa magaalada Washington u tagay si ay uga qayb-galaan Shirarka Xilliga Gu’ga ee Hay’adda Lacagta Adduunka (IMF) iyo Bangiga Adduunka, halkaas oo ay isugu yimaadaan madaxda maaliyadda ee caalamka.

Kulankan ayaa diiradda lagu saaray saameynta dhaqaale ee ka dhalatay xaaladaha cakiran ee caalamiga ah, oo ay ka mid yihiin arrimaha amniga, isbeddellada juquraafi-siyaasadeed, iyo saameynta isbeddelka cimilada, kuwaas oo dhammaantood si toos ah u taabanaya kobaca dhaqaalaha Soomaaliya.

Sidoo kale, labada dhinac ayaa ka wada hadlay dadaallada isdaba-joogga ah ee ay Dowladda Federaalka Soomaaliya ugu jirto xoojinta dakhliga gudaha, horumarinta maamulka maaliyadda guud, iyo kobcinta dhaqaalaha dalka, si loo xaqiijiyo horumar waara oo isku-filnaansho leh.

Intii ay shirarku socdeen, Wasiirka ayaa sidoo kale kulamo doceedyo muhiim ah la yeeshay madax kala duwan.

Waxa uu kulan la qaatay Agaasimaha Fulinta ee Hay’adda Lacagta Adduunka (IMF), Dr. Maxamed Maait, iyo Agaasimaha Waaxda Bariga Dhexe iyo Bartamaha Aasiya ee isla hay’addaas, Jihad Azour.

Kulamadan ayaa si qoto dheer loogu falanqeeyay horumarka laga sameeyay dhaqangelinta barnaamijka dib-u-habeynta dhaqaalaha Soomaaliya, caqabadaha ka dhashay isbeddelka cimilada, saameynta xiisadaha juquraafi-siyaasadeed ee gobolka iyo caalamka, iyo sidii loo heli lahaa fursado maalgelin oo horseeda horumar waara.

Wasiirka ayaa hoosta ka xarriiqay in IMF ay tahay bah-wadaag muhiim u ah isbeddelka iyo dib-u-dhiska dhaqaalaha dalka.

Dhanka kale, Wasiir Biixi ayaa la kulmay Madaxweyne Ku-xigeenka Hay’adda Maaliyadda Adduunka (IFC) ee gobolka Afrika, Tafara, iyagoo ka wada hadlay sidii loo dhiirrigelin lahaa, loona taageeri lahaa maalgashiga qaybta gaarka loo leeyahay (Private Sector) ee dalka.

Guud ahaan, Wasiirka Maaliyadda iyo wafdigiisa ayaa intii ay ku sugnaayeen Washington D.C waxay kulamo miro-dhal ah la yeesheen mas’uuliyiin sarsare oo ka kala tirsan Bangiga Adduunka, IMF, Bangiga Horumarinta Afrika (AfDB), iyo saaxiibada caalamiga ah ee taageera horumarka Soomaaliya.