Ciidanka Suudaan ayaa Isniintii sheegay in uu jebiyay go’doomin muddo dheer saarneyd magaalada Dilling ee Koonfurta Kordofan, halkaas oo ciidamo hubeysan ay cunaqabayn saareen magaalada in ka badan hal sano iyo bar.
Tan iyo Abriil 2023, Suudaan waxaa ragaadiyay dagaal u dhexeeya ciidanka dowladda iyo xoogagga hubeysan ee Rapid Support Forces (RSF), kaas oo sababay dhimashada tobanaan kun oo qof.
Dagaalka ayaa sidoo kale barakiciyay ku dhowaad 11 milyan oo qof, wuxuuna kiciyay waxa Qaramada Midoobay ku tilmaantay qalalaasaha barakaca iyo gaajada ee ugu weyn dunida.
Bayaanka ciidanka ayaa lagu sheegay in ciidamadoodu ay “ku guuleysteen furitaanka waddada Dilling kaddib hawlgal milatari oo guuleystay,” iyagoo ku andacoonaya inay RSF gaarsiiyeen “khasaaro culus.”
Horumarka ciidanka
Horumarka ay sameeyeen ciidanka ayaa xaqiijiyay gacan ku haynta marinada woqooyi iyo koonfur ee laga galo Dilling.
Dadaalka ka socda agagaarka Dilling ayaa imaanaya xilli ciidanku isku dayayaan inay joojiyaan horumar ay xoogagga hubeysan ka sameynayaan guud ahaan gobolka Kordofan.
RSF, oo ay taageerayaan garabka Dhaqdhaqaaqa Xoreynta Shacabka Suudaan – Waqooyi ee uu hoggaamiyo Abdelaziz al-Hilu, ayaa u weecday dhanka bariga kaddib markii ay bishii Oktoobar ee la soo dhaafay qabsadeen saldhiggii ugu dambeeyay ee ciidanka ee Galbeedka Darfur.
Tan iyo markaas, kooxda hubeysan ayaa sii haystay Galbeedka Kordofan, waxayna la wareegtay Heglig oo ah hoyga goobta shidaalka ugu weyn Suudaan, sidoo kalena way adkeeyeen go’doominta Kadugli oo ay gaajo ka jirto, taas oo ah caasimadda Koonfur Kordofan.
Kumannaan ka barakacay Kordofan
In ka badan 65,000 qof ayaa ka barakacay gobolka Kordofan tan iyo Oktoobar, sida ay muujinayaan tirakoobkii ugu dambeeyay ee Qaramada Midoobay.
Qiimeyn ay Qaramada Midoobay taageertay sanadkii hore ayaa horey u xaqiijisay in gaajo ka jirto Kadugli, oo ay RSF go’doomin ku hayeen in ka badan hal sano iyo bar.
Qiimeynta ayaa sheegtay in xaaladda Dilling ay u badan tahay inay la mid tahay, balse arrimo amni iyo marin la’aan dartood aan weli si rasmi ah loogu dhawaaqin.
