Wasiirka Waxbarashada, Hiddaha iyo Tacliinta Sare ee Dowladda Federaalka Soomaaliya, Mudane Faarax Sheekh Cabdulqaadir, ayaa si diirran xarunta wasaaradda ugu soo dhaweeyay dhiggiisa Wasiirka Tacliinta Sare iyo Cilmibaarista ee Jamhuuriyadda Jabuuti, Mudane Dr. Nabiil Maxamed Axmed, iyo wafdi heer sare ah oo uu hoggaaminayo.
Dr. Nabil iyo wafdiga uu hoggaaminayo, oo kulanka ka hor si maqaam sare leh loogu soo dhaweeyey garoonka diyaaradaha caalamiga ah ee Aadan Cadde, ayaa Soomaaliya u yimid ka qaybgalka Shirweynaha 3-aad ee Waxbarashada Qaranka, kaas oo diiradda saaraya tayeynta waxbarashada, xoojinta iskaashiga heer gobol iyo dardargelinta hirgelinta qorshayaasha istaraatiijiyadeed ee waxbarashada Soomaaliya.
Dhanka kale wasiir Farah iyo dhiggiisa Jabuuti ayaa kulan ay yeesheen kaga wadahadlay xoojinta iskaashiga dhinaca waxbarashada ee u dhexeeya dawladaha walaalaha ah ee Soomaaliya iyo Jabuuti, iyadoo xoogga la saarayo tacliinta sare, cilmibaarista, wadaagidda khibradaha, iyo horumarinta guud ahaan tayada waxbarasho ee gobolka.
Kulankan iyo soo dhaweynta diirran ayaa muujinaysa xiriirka walaaltinimo ee xooggan iyo iskaashiga dhow ee ka dhexeeya Soomaaliya iyo Jabuuti, gaar ahaan dhinaca waxbarashada.
