Ku-simaha Wasiirka Wasaaradda Qoyska iyo Horumarinta Xuquuqda Aadanaha, ahna Wasiiru Dowlaha Wasaaradda, Maxamed Cismaan Cumar, ayaa si rasmi ah magaalada Muqdisho uga furay kulan wadatashi ah oo ay ka qeybgalayaan dhinacyada ay khuseyso, kaas oo looga hadlayo suurtagalnimada in Soomaaliya ay ku biirto Heshiiska Caalamiga ah ee Ciribtirka Dhammaan Noocyada Takoorka ka dhanka ah Haweenka (CEDAW).
Wasiiru Dowlaha oo khudbad ka jeediyay furitaanka kulanka ayaa carrabka ku adkeeyay muhiimadda ay leedahay horumarinta sinnaanta jinsiga, ilaalinta xuquuqda haweenka iyo xoojinta doorka hay’adaha dowladda iyo qeybaha kala duwan ee bulshada ee wax ka qabashada dhammaan noocyada takoorka ka dhanka ah haweenka.
Wuxuu sheegay in kulankan, oo ay soo qabanqaabisay Ururka Qaranka Suxufiyiinta Soomaaliyeed (NUSOJ), iyadoo la kaashanayo Hay’adda Qaramada Midoobay u qaabilsan Haweenka (UN Women), uu yahay fursad muhiim ah oo lagu kordhinayo fahamka bulshada ee Heshiiska CEDAW, laguna falanqeynayo hannaanka suurtagalka ah ee Soomaaliya ay ugu biiri karto heshiiskaas, isla markaana lagu diyaarinayo talooyin wax ku ool ah oo hagaya tallaabooyinka xiga.
Wasiiru Dowlaha ayaa adkeeyay in wadatashigu uu ku saleysnaado Dastuurka Soomaaliya, iyadoo si buuxda loo tixgelinayo diinta, dhaqanka iyo duruufaha bulsho ee dalka. Wuxuu ku baaqay in doodaha ay ka qeybqaataan hay’adaha dowladda, Baarlamaanka, garsoorka, ururrada haweenka, bulshada rayidka ah, culimada, odayaasha dhaqanka, warbaahinta iyo dhallinyarada.
Wuxuu sidoo kale carrabka ku adkeeyay muhiimadda ay leedahay ka qeybgalka iyo hoggaaminta haweenka inta ay socdaan hannaanka wadatashiga iyo go’aan-qaadashada.
Wasiiru Dowlaha ayaa Ururka NUSOJ ku bogaadiyay qabanqaabada kulanka, isagoo sidoo kale Hay’adda UN Women uga mahadceliyay taageerada ay ka geysatay fududeynta wadatashiga.
Ugu dambeyn, Wasiiru Dowlaha ayaa si rasmi ah u furay kulanka, isagoo ka qeybgalayaasha u rajeeyay wadahadallo miro-dhal ah oo laga soo saaro talooyin wax ku ool ah.
