Madaxweynaha Soomaaliya, Xasan Sheekh Maxamuud, ayaa ku baaqay xabbad-joojin degdeg ah oo waarta oo ka dhaqan-gasha Marinka Qaza, gargaar bini’aadantinimo oo aan carqalad lahayn iyo in dib loo dardargeliyo dadaallada caalamiga ah ee lagu gaarayo xal laba dal ah, kaas oo uu ku tilmaamay waddada keliya ee lagu gaari karo nabad caddaalad ku dhisan oo ka dhalata Bariga Dhexe.
Isagoo Khamiistii khudbad ka jeediyay Golaha Guud ee Qaramada Midoobay, Maxamuud ayaa sheegay in Soomaaliya ay kala shaqeynayso xubnaha Golaha Ammaanka iyo dalalka kale ee QM dadaallada lagu raadinayo nabadda iyo xasilloonida Bariga Dhexe, Afrika iyo Yurub.
Soomaaliya ayaa bishii Juun 2024 loo doortay xubin aan joogto ahayn oo ka tirsan Golaha Ammaanka ee Qaramada Midoobay, muddo-xileedka 2025–2026, iyadoo ay weheliyaan afar dal oo kale oo Golaha Guud doortay.
“Soomaaliya, iyada oo ah xubin aan joogto ahayn oo ka tirsan Golaha Ammaanka ee Qaramada Midoobay, waxa ay si aan kala go’ lahayn uga shaqeynaysaa horumarinta mabaadi’da iyo qiyamka nabadda, xasilloonida iyo fursadaha la wadaago ee adduunka oo dhan,” ayuu yiri Maxamuud.
“Waxaan si firfircoon ula shaqeynaynaa dhammaan xubnaha Golaha Ammaanka iyo guud ahaan xubnaha QM si xal nabadeed loogu helo Bariga Dhexe, Afrika iyo Yurub,” ayuu raaciyay.
Soomaaliya oo walaac ka muujisay xaaladda Gaza
Madaxweynaha ayaa sheegay in Soomaaliya ay weli walaac xooggan ka qabto xaaladda shacabka Falastiin, isagoo si gaar ah u xusay rabshadaha, barakicinta iyo xaaladaha nololeed ee ka jira dhulka Falastiin ee la haysto, oo ay Qaza ku jirto.
“Rabshadaha socda, barakicinta iyo darxumada lagala kulmayo dhulalka la haysto, oo ay ku jirto Qaza, waxa ay u baahan yihiin damiirkeenna wadajirka ah iyo tallaabo degdeg ah,” ayuu yiri.
Hadalkiisa ayaa ku soo beegmay isla maalintii ay Wasaaradda Caafimaadka Gaza sheegtay in shan Falastiiniyiin ah la dilay, 35 kalena la dhaawacay 24-kii saac ee la soo dhaafay.
Wasaaradda ayaa sheegtay in isbitaallada Qaza la soo gaarsiiyay meydadka shan qof, halka 35 qof oo dhaawac ahna la daweeyay muddadaas.
Sida ay sheegtay wasaaraddu, tirada Falastiiniyiinta lagu dilay Qaza tan iyo Oktoobar 2023 ayaa gaartay 73,928 qof, halka 175,030 kalena la dhaawacay.
Wasaaradda ayaa sidoo kale sheegtay in 1,408 Falastiiniyiin ah la dilay, 4,916 kalena la dhaawacay tan iyo markii uu dhaqan-galay heshiiska xabbad-joojinta bishii Oktoobar 2025.
