Mareykanka iyo Midowga Yurub ayaa ku baaqay in ciidanka Rwanda iyo maleeshiyada M23 ay si degdeg ah u joojiyaan weerarka ku wajahan bariga Jamhuuriyadda Dimuqraadiga ah ee Congo, maalmo ka dib markii madaxda dalalkaasi ay Washington ku kala saxiixdeen heshiis xabbad-joojin ah.

Kooxda uu hogaaminayo Mareykanku ayaa walaac ka muujiyay dagaalka ka socda meel u dhow Burundi waxayna sheegeen inuu "khatar ku hayo xasilloonida guud ee gobolka".

Bayaanka wadajirka ah ayaa lagu yiri in dalalku ay "ku boorinayaan M23 iyo Ciidanka Difaaca Rwanda (RDF) in ay si dhaqsi ah u joojiyaan howlgalladooda duullaanka ee bariga DRC, gaar ahaan Koonfurta Kivu, isla markaana RDF ay ka baxdo bariga DRC." Rwanda ayaa marar badan beenisay warbixinada sheegaya inay la shaqaynayaan M23 si ay xasillooni-darro uga abuuraan bariga DRC.

Bayaanka wadajirka ah ee ay soo saartay Waaxda Arrimaha Dibadda ee Mareykanka ayaa sidoo kale ugu baaqay M23 "in ay ku noqdaan meelahii ay hore u joogeen oo ay ixtiraamaan qodobbada ku jirey ballan-qaadyadii heshiiskii" lagu gaaray wadaxaajoodyadii ay la yeesheen dowladda Kinshasa kuwaas oo ka dhacay Qatar bishii Luulyo.

Sidoo kale, Midowga Yurub ayaa saxiixay bayaanka.

Madaxda Rwanda iyo DRC ayaa Khamiistii Washington ku saxiixay heshiis iyadoo uu goob joog ahaa Madaxweynaha Mareykanka Donald Trump.

Si kastaba ha ahaatee, DRC iyo dalka deriska ah ee Burundi labaduba waxay muujiyeen walaac maadaama dagaalyahannada M23 ay weerareen deegaano xuduudaha ku yaal.

Bayaanka wadajirka ah ee Mareykanka iyo Midowga Yurub ayaa sidoo kale muujiyey "walaac gaar ah oo ku saabsan kororka isticmaalka diyaaradaha aan duuliyaha lahayn ee dagaalka".

"Tani waxay ka dhigan tahay kordhinta colaadda waxayna halis weyn ku tahay dadka rayidka ah," ayuu lagu yiri bayaanka.