Turkiga ayaa wasiirro cusub u magacaabay wasaaradaha cadaaladda iyo arrimaha gudaha ah, kaddib wareegtooyin madaxweyne oo uu saxiixay Madaxweyne Recep Tayyip Erdogan laguna daabacay Wargeyska Rasmiga ah.

Sida ku cad wareegtooyinka, Xeer Ilaaliyaha Guud ee Istanbul, Akin Gurlek, ayaa loo magacaabay Wasiirka Cadaaladda, isagoo beddelay Yilmaz Tunc, halka Guddoomiyaha Gobolka Erzurum, Mustafa Ciftci, loo magacaabay Wasiirka Arrimaha Gudaha, isagoo xilka kala wareegay Ali Yerlikaya.

Magacaabista ayaa lagu sameeyay si waafaqsan Qodobada 104 iyo 106 ee Dastuurka Turkiga.

Kaddib ku dhawaaqista, Ali Yerlikaya ayaa xaqiijiyay inuu si rasmi ah xilka Wasaaradda Arrimaha Gudaha ugu wareejiyay Mustafa Ciftci, isaga oo u rajeeyay guul xilka cusub.

Bayaan uu ku daabacay baraha bulshada, Yerlikaya ayaa sheegay inuu ahaa Wasiirka Arrimaha Gudaha tan iyo 4-tii Juun 2023, isagoo ku yimid oggolaanshaha Madaxweyne Erdogan, wuxuuna uga mahadceliyay madaxweynaha kalsoonida iyo taageerada uu siiyay muddadii uu xilka hayay.

Wuxuu sidoo kale u mahadceliyay shaqaalaha Wasaaradda Arrimaha Gudaha doorkooda ku aaddan sugidda kala dambeynta iyo amniga guud, isagoo gabagabadii farriintiisa u rajeeyay wasiirka cusub guul iyo horumar.

Dhankiisa, Yilmaz Tunc ayaa isna diray farriin sagootin ah kaddib magacaabista Akin Gurlek ee Wasiirka Cadaaladda.

Tunc ayaa sheegay in la shaqeynta Madaxweyne Erdogan iyo ka qaybqaadashada socdaalka siyaasadeed ee xisbiga talada haya ay ahayd sharaf weyn, isagoo xusay in magacaabistiisa Wasiirka Cadaaladda bishii Juun 2023 ay laheyd mas’uuliyad culus.

Wuxuu tilmaamay isbeddellada la sameeyay 23-kii sano ee la soo dhaafay intii uu hoggaanka hayay Madaxweyne Erdogan si loo xoojiyo dimuqraadiyadda iyo xukunka sharciga, isagoo intaas ku daray inuu sii wadi doono u adeegidda dalka xilal kale oo mustaqbalka ah.

Tunc ayaa sidoo kale u hambalyeeyay Gurlek, una rajeeyay guul xilkiisa cusub.

Magacaabista ayaa si degdeg ah u dhaqan gashay kaddib markii lagu daabacay Wargeyska Rasmiga ah.