Xarunta Turkiga ee La-dagaallanka Wararka Been-abuurka ah ayaa beenisay eedeymo lagu faafiyey baraha bulshada oo ku andacoonaya in Turkigu si keli ah uga faa’iideysanayo kheyraadka dabiiciga ah ee Soomaaliya, gaar ahaan shidaalka.
Bayaan ay soo saartay, Xaruntu waxay ku tilmaantay eedeymaha kuwo been abuur ah oo marin-habaabin ah, iyadoo sheegtay in si ula kac ah loo sameeyay si loo qalloociyo xaqiiqooyinka loona wiiqo iskaashiga sii xoogeysanaya ee u dhexeeya labada dal.
Waxay caddeysay in heshiiska ay wada saxiixdeen Shirkadda Shidaalka Turkiga (TPAO) iyo Hay’adda Batroolka Soomaaliya uu si cad u qeexayo in kheyraadka dabiiciga ah ee Soomaaliya ay kaliya leeyihiin shacabka Soomaaliyeed.
Xaruntu waxay carrabka ku adkeysay in xiriirka Turkiga iyo Soomaaliya uu ku dhisan yahay iskaashi wadaag ah oo u dhexeeya laba dal oo madaxbannaan, balse aanu ahayn ka faa’iideysi. Waxay sidoo kale ugu baaqday shacabka inaysan rumaysan wararka been-abuurka ah ee lagu bartilmaameedsanayo xiriirka Ankara iyo Muqdisho.
