Madaxweynaha Jamhuuriyadda Federaalka Soomaaliya, Xassan Sheekh Maxamuud, ayaa Arbacadii booqasho shaqo ku tagay Dekedda Muqdisho, halkaas oo uu ku kormeeray howlaha lagu horumarinayo kaabeyaasha dekedda iyo qorshayaasha lagu casriyeynayo marin-biyoodka ganacsiga ee ugu weyn dalka.
Intii uu booqashada ku jiray, madaxweynuhu wuxuu kormeeray haamaha kaydka shidaalka, bakhaarada iyo dhismaha cusub ee maamulka dekedda, isagoo warbixin ka dhageystay dadaallada lagu dayactirayo kaabeyaasha muhiimka ah iyo horumarinta adeegyada loo fidiyo ganacsatada iyo shacabka.
Madaxweynaha ayaa kulan la yeeshay Wasiirka Dekedaha iyo Gaadiidka Badda iyo Agaasimaha Guud ee Dekedda Muqdisho, kuwaas oo uga warbixiyay howlaha dekedda, mashaariicda horumarineed ee socda iyo qorshaha lagu dhisayo Deked Cusub, si loo daboolo baahida sii kordheysa ee ganacsiga caasimadda looguna taageero kobaca dhaqaalaha Soomaaliya.
Madaxweynuhu wuxuu sheegay in horumarinta dekedaha dalka ay muhiim u tahay dardargelinta kobaca dhaqaalaha, ballaarinta ganacsiga, abuurista fursado shaqo iyo xoojinta xiriirka Soomaaliya ay la leedahay suuqyada caalamiga ah. Wuxuu ku boorriyay maamulka dekedda inay dardargeliyaan dadaallada lagu horumarinayo hufnaanta iyo casriyeynta adeegyada dekedda.
