Taliyaha Ciidanka Xoogga Dalka Soomaaliyeed (CXDS), Sareeye Gaas Ibraahim Maxamed Maxamuud, oo uu wehelinayey Guddoomiyaha Maxkamadda Darajada Koowaad ee Ciidamada Qalabka Sida, Gaashaanle Xasan Cali Nuur Shuute, ayaa Talaadadii guddoomiyey munaasabadda qalin-jabinta dufcad cusub oo ka tirsan Ciidanka Kumaandooska Danab, taas oo ka dhacday saldhigga milatari ee Balli-doogle ee gobolka Shabeellaha Hoose.
Munaasabadda ayaa waxaa ka qayb galay Taliyaha Saldhigga Maraykanka ee Balli-doogle, Taliyaha AOB BMA, Gaashaanle Sare Robert Zimmerman, iyo saraakiil sare oo ciidan iyo mas’uuliyiin kale.
Isagoo la hadlayey ciidanka qalin-jabinayey, Sareeye Gaas Ibraahim Maxamed Maxamuud ayaa ugu hambalyeeyey dhammaystirka tababarkooda, wuxuuna ku boorriyey inay ilaaliyaan anshaxa, xirfadda iyo daacadnimada marka ay gudanayaan waajibaadkooda qaran.
Tababarkan ayaa qayb ka ah dadaallada socda ee lagu xoojinayo awoodda hawlgal iyo kartida xirfadeed ee Ciidanka Xoogga Dalka Soomaaliyeed, gaar ahaan Ciidanka Kumaandooska Danab, oo door hoggaamineed ka qaata howlgallada ka dhanka ah argagixisada Al-Shabaab.
