Ra’iisul Wasaaraha Xukuumadda Federaalka Soomaaliya, Mudane Xamza Cabdi Barre, ayaa intii uu ku guda jiray booqashadiisa rasmiga ah ee Qatar kulamo xiriir ah la yeeshay hay’ado muhiim ah oo ka tirsan dowladda Qatar iyo shirkado, isaga oo diiradda saaraya xoojinta xiriirka laba geesoodka ah, dhiirrigelinta maalgashiga iyo is-weydaarsiga khibradaha.
Ra’iisul Wasaaraha iyo wafdigiisa ayaa la kulmay Qatar Diar, Hay’adda Maalgashiga Qatar (QIA), Qatar Airways iyo Xarunta Hoggaaminta Qatar, iyadoo ay u dheeraayeen kulamo heer sare ah oo ay la yeesheen madaxda Qatar.
Intii ay socdeen kulamada, wafdiga Soomaaliya ayaa soo bandhigay fursadaha maalgashi ee ka jira Soomaaliya, gaar ahaan dhinacyada kalluumeysiga, tamarta, dalxiiska iyo gaadiidka, iyaga oo sidoo kale tilmaamay kobaca dhaqaale ee dalka iyo fursadaha cusub ee ka dhashay horumarka socda.
Hay’adaha iyo shirkadaha Qatar ayaa muujiyay xiisaha ay u qabaan suuqa Soomaaliya ee sii kobcaya iyo sahaminta fursado maalgashi oo wax-ku-ool ah oo faa’iido u yeelan kara labada dal. Wadahadallada ayaa sidoo kale lagu soo qaaday siyaabaha lagu xoojin karo iskaashiga ganacsiga, gaadiidka, horumarinta hay’adaha iyo dhisidda awoodda hoggaamineed.
Booqashada Ra’iisul Wasaaraha ayaa qayb ka ah dadaallada Dowladda Federaalka Soomaaliya ee lagu xoojinayo iskaashiga istaraatiijiga ah, lagu ballaarinayo iskaashiga dhaqaale, laguna soo jiidanayo maalgashiga shisheeye.
Kulamadan ayaa la filayaa inay furaan waddooyin cusub oo iskaashi dhaqaale iyo maalgashi, iyadoo sidoo kale la sii xoojinayo saaxiibtinimada soo jireenka ah iyo xiriirka laba geesoodka ah ee Soomaaliya iyo Qatar.
