Shirweynaha Saddexaad ee Adkeysiga Musiibooyinka Soomaaliya (SDRC 2026) ayaa Talaadadii ka furmay magaalada Muqdisho, isagoo isu keenay mas’uuliyiin dowladeed, khubaro iyo cilmi-baarayaal si loo xoojiyo dadaallada qaran ee wax looga qabanayo musiibooyinka soo noqnoqda, loona dhiso adkeysi muddada fog ah.
Shirweynahan oo soconaya laba maalmood, isla markaana ay si wadajir ah u soo qabanqaabiyeen Hay’adda Maareynta Musiibooyinka Qaranka (SoDMA) iyo Jaamacadda Muqdisho, ayaa diiradda lagu saarayaa cilmi-baarista, iskaashiga iyo xalalka waara ee lagu yareynayo nuglaanshaha bulshooyinka ee musiibooyinka.
Guddoomiyaha Hay’adda SoDMA, Maxamuud Macallin Cabdulle, ayaa tilmaamay muhiimadda shirweynaha, isagoo xusay in Soomaaliya ay muddo dheer la daalaa-dhaceysay musiibooyin soo noqnoqda oo sababay caqabado baahsan oo dhinacyada bani’aadannimada, bulshada iyo dhaqaalaha ah.
Wuxuu carrabka ku adkeeyay in wax ka qabashada caqabadahan ay u baahan tahay dadaal wadajir ah, cilmi-baaris iyo qorsheyn wax ku ool ah, si loo horumariyo xalal waara, loona xoojiyo u diyaar-garowga iyo adkeysiga dalka.
Madaxweynaha Jaamacadda Muqdisho, Dr. Ibraahim Maxamed Mursal, oo ka hadlay furitaanka shirweynaha, ayaa adkeeyay doorka aqoonta, cilmi-baarista iyo wada shaqeynta ee fahamka khataraha musiibooyinka, ka hortagga dhibaatooyinka soo noqnoqda iyo dhisidda bulshooyin adkeysi leh.
Dr. Mursal ayaa ku baaqay hannaan loo dhan yahay iyo xalal waara oo lagu yareynayo nuglaanshaha bulshada, isagoo ballanqaaday in Jaamacadda Muqdisho ay sii xoojin doonto iskaashiga ay la leedahay hay’adaha dowladda, waaxda gaarka loo leeyahay iyo ganacsatada, si loo taageero dadaallada Soomaaliya ee xoojinta adkeysiga musiibooyinka.
Shirweynaha ayaa waxaa ka qaybgalaya wasiirro ka tirsan Dowladda Federaalka Soomaaliya, khubaro ku takhasustay adkeysiga musiibooyinka, cilmi-baarayaal iyo daneeyayaal kale.
