Dr Maryan Qaasim oo ka hadashay daahfurka Isbahaysiga Caalamiga ah ee Xuquuqda Carruurta ee Muqdisho

Guddoomiyaha Guddiga Madaxa-bannaan ee Xuquuqda Aadanaha Qaranka, Dr. Maryam Qaasim, ayaa Arbacadii khudbad muhiim ah ka jeedisay munaasabadda daahfurka isbahaysi istiraatiiji ah oo ay sameeyeen afar hay’adood oo caalami ah oo hormuud u ah daryeelka carruurta.

Munaasabadda ka dhacday Muqdisho ayaa astaan u noqotay mideynta rasmiga ah ee dadaallada ay wadaan World Vision International, Save the Children International, SOS Soomaaliya, iyo Plan International, kuwaas oo ku midoobay magaca “Joining Forces Alliance (JFA)”.

Khudbaddeeda, Dr. Maryam Qaasim ayaa adkaysay sida Guddiga uga go’an tahay difaaca iyo horumarinta xuquuqda carruurta Soomaaliyeed. Waxay sheegtay in ilmo kasta uu xaq u leeyahay daryeel, ilaalin iyo fursado siman oo ah xuquuq aasaasi ah oo bani’aadannimo.

Guddoomiyuhu waxay xustay in mas’uuliyadda ilaalinta xuquuqdaasi ay tahay mid wadajir ah, oo aan ku koobnayn hay’adaha oo keliya, balse ay ku lug leeyihiin dowladda, baarlamaanka, hay’adaha waxbarashada iyo muwaadin kasta oo Soomaaliyeed, laga bilaabo heerka qoyska.

Isbahaysiga cusub ayaa ujeedkiisu yahay in la xoojiyo xuquuqda carruurta isla markaana loo ololeeyo dib-u-habayn siyaasadeed oo ku saleysan mabaadi’da xuquuqda carruurta.

Dr. Maryam Qaasim ayaa soo dhoweysay hindisaha, iyadoo tilmaantay in iskaashiga u dhexeeya hay’adaha caalamiga ah iyo hay’adaha qaranka uu muhiim u yahay dhismaha jawi ilaalin ah oo carruurta Soomaaliyeed ku kobci karaan iyaga oo ka madax-bannaan xadgudub iyo tacaddi.

Waxay gabagabadii ku baaqday in dhammaan daneeyayaashu ay ka gudbaan hadal kaliya, isla markaana la hubiyo in daahfurka isbahaysigan uu isu beddelo tallaabooyin wax ku ool ah oo si toos ah u hagaajiya nolosha carruurta guud ahaan dalka.