Ergeygii hore oo Qaramada Midoobay u qaabilsanaa Soomaaliya, Maxamed Cabdi Afey, ayaa si rasmi ah u baalfuray buuggiisa cusub munaasabad ay ka soo qayb galeen Ra’iisul Wasaaraha Jamhuuriyadda Federaalka Soomaaliya, Mudane Xamsa Cabdi Barre, mas’uuliyiin kale oo ka tirsan dowladda, diblomaasiyiin iyo xubno ka tirsan bulshada rayidka ah.

Buugga oo ka hadlaya baadigoobkii nabadda ee Geeska Afrika ayaa iftiiminaya dadaalladii kala dambeeyay ee lagu dhisayay dowladnimada Soomaaliya xilliyadii burburka iyo marxaladihii kala duwanaa ee la soo maray.

Ra’iisul Wasaaraha ayaa munaasabadda ka sheegay in nabadda Soomaaliya ay saameyn ku leedahay guud ahaan gobolka Geeska Afrika, isagoo xusay in kala qaybsanaanta Soomaaliya ay halis ku tahay amniga iyo xasilloonida gobolka, loona baahan yahay in la xoojiyo midnimada iyo wadajirka Jamhuuriyadda Federaalka Soomaaliya.

Mudane Xamsa Cabdi Barre ayaa sidoo kale tilmaamay in buuggan oo ku qoran luuqadda Soomaaliga uu muhiim u yahay bulshooyinka gobolka, isagoo carrabka ku adkeeyay ahmiyadda ay leedahay faafinta iyo ilaalinta Afka, Dhaqanka iyo Diinta.

Ra’iisul Wasaaraha ayaa ku dhiirrigeliyay bulshada akhrinta taariikhda iyo waayo-aragnimada la soo maray, isagoo uga mahadceliyay qoraaga, Danjire Maxamed Cabdi Afey, dadaalka uu ku bixiyay uruurinta iyo qorista buuggan.