Hay’adda Socdaalka iyo Jinsiyadda Soomaaliya ayaa maanta si rasmi ah u hirgelisay nidaam cusub oo muwaadiniinta u safraya gobollada dalka looga baahan yahay inay adeegsadaan Kaarka Aqoonsiga Qaranka.
Tallaabadan ayaa lagu tilmaamay mid looga gol-leeyahay casriyeynta maamulka xuduudaha iyo fududeynta socdaalka gudaha.
Agaasimaha Guud ee Hay’adda, Mustafa Duhulow, oo kormeer ku tegey garoonka diyaaradaha ee caalamiga ee Aadan Cabdulle ee Muqdisho, ayaa daah-furay habraaca cusub ee lagu xaqiijinayo aqoonsiga rakaabka.
Agaasima ayaa warbixin kaga dhageystay madaxda Waaxda Xuduudaha heerka diyaargarowga farsamo iyo sidii adeeggan loogu fududeyn lahaa dadweynaha.
Saaka waxaa garoonka ka dhoofay rakaabkii ugu horreeyay ee lagu tijaabiyay nidaamka, iyadoo adeegsigii Kaarka Aqoonsiga Qaranka uu beddelay hababkii hore ee aqoonsiga.
Wararka ayaa sheegaya in nidaamkan dhijitaalka ah uu qayb ka yahay dadaallada lagu xoojinayo amniga iyo la socodka dhaqdhaqaaqa dadka ee gudaha dalka si waafaqsan sharciga socdaalka.
Hay’adda ayaa faray saraakiisha ka shaqaysa marinnada laga dhoofo inay muujiyaan dulqaad iyo tixgelin inta lagu jiro xilliga kala-guurka, maadaama muwaadiniintu ay hadda bilaabeen la-qabsiga nidaamkan cusub.
Hirgelintan ayaa loo arkaa tallaabo muhiim ah oo dhanka hufnaanta adeegga iyo amniga qaranka loo qaaday.
