Iiraan oo drone ku weerartay Azerbaijan iyo Baku oo sheegtay inay xaq u leedahay inay ka jawaabto
Azerbaijan ayaa cambaareysay weerarro diyaarado aan duuliye lahayn oo Iiraan ka yimid oo ka dhacay meel u dhow garoonka diyaaradaha ee Nakhchivan, kuwaas oo dhaawacay dad rayid ah isla markaana sii huriyay xiisadaha gobolka.
Diyaarado aan duuliye lahayn oo laga soo diray Iiraan ayaa Khamiistii ku dhacay gobolka go’doonsan ee Azerbaijan ee Nakhchivan, taasoo sababtay dab ka kacay meel u dhow Garoonka Diyaaradaha Caalamiga ah ee Nakhchivan.
Muuqaallo la duubay ayaa muujiyay qiiq madow oo qaro weyn oo ka kacaya meel u dhow garoonka diyaaradaha, kaas oo ku yaalla qiyaastii 10 kiiloomitir u jirta xadka Iiraan.
Wasaaradda Arrimaha Dibadda ee Azerbaijan ayaa xaqiijisay in weerarro diyaarado aan duuliye lahayn oo ka yimid dhulka Iiraan ay dhaceen duhurnimadii Khamiista, iyadoo hal weerar lagu beegsaday xarunta garoonka diyaaradaha ee Jamhuuriyadda Is-maamulka Nakhchivan, halka weerar kale uu ka dhacay meel u dhow dhisme dugsi oo ku yaalla tuulada Shekarabad.
“Waxaan si adag u cambaareynaynaa weerarradan diyaaradaha aan duuliye lahayn ee laga fuliyay dhulka Jamhuuriyadda Islaamiga ah ee Iiraan, kuwaas oo sababay khasaare soo gaaray dhismaha garoonka diyaaradaha iyo dhaawaca laba qof oo rayid ah,” ayay Wasaaradda Arrimaha Dibadda ee Azerbaijan ku tiri bayaan.
Baku waxay weerarradan ku tilmaantay kuwo jebinaya sharciga caalamiga ah isla markaana sii hurinaya xiisadaha gobolka, iyadoo ka dalbatay Iiraan sharaxaad degdeg ah iyo tallaabooyin ka hortag ah.
“Waxaan ka dalbaneynaa Jamhuuriyadda Islaamiga ah ee Iiraan inay muddo gaaban gudaheed ku caddeyso arrintan, bixiso sharaxaad, isla markaana qaaddo tallaabooyin degdeg ah oo lagama maarmaan ah si looga hortago in dhacdooyin noocan oo kale ah mar kale dhacaan,” ayaa lagu yiri bayaanka.
Baku waxay xaq u leedahay inay jawaab bixiso
Dowladda Azerbaijan ayaa ka digtay inay xaq u leedahay inay qaaddo tallaabooyin ku habboon haddii weerarro noocan oo kale ah mar kale dhacaan.
Safiirka Iiraan u fadhiya Azerbaijan, Mojtaba Dermichilu, ayaa loo yeeray Wasaaradda Arrimaha Dibadda ee Azerbaijan.
“Dhinaca Iiraan waxaa loo gudbin doonaa mudaharaad adag waxaana la siin doonaa qoraal cabasho rasmi ah,” ayay wasaaraddu tiri.