Machadka Isgaarsiinta iyo Teknooloojiyadda Qaranka (NTTI) ee hoos yimaada Wasaaradda Isgaarsiinta iyo Teknooloojiyadda ee Xukuumadda Federaalka Soomaaliya, oo kaashanaya xarunta Arkaan Leadership, ayaa magaalada Muqdisho ka daah-furay aqoon-isweydaarsi ballaaran oo socon doona muddo laba maalmood ah.
Barnaamijkan ayaa si gaar ah loogu talagalay 120 gabdhood oo wax ka barta culuumta isgaarsiinta iyo teknooloojiyadda ee jaamacadaha kala duwan ee dalka. Tababarkan ayaa diiradda saaraya xoojinta aqoonta iyo xirfadaha gabdhaha ee ku aaddan adeegsiga Garaad Gacmeedka (AI), si ay kaalin muuqata uga qaataan horumarka dhijitaalka ah ee dalka.
Madashan ayaa ah mid horudhac u ah xuska toddobaadka “Gabdhaha iyo Isgaarsiinta Casriga ah”, oo ah munaasabad caalami ah oo uu asteeyay Ururka Isgaarsiinta Caalamiga ah (ITU), taas oo ujeeddadeedu tahay in dhiirrigelin iyo taageero la siiyo sidii loo kordhin lahaa ka-qaybgalka haweenka ee hal-abuurka teknooloojiyadda casriga ah.
Munaasabadda furitaanka tababarkan ayaa waxaa goobjoog ka ahaa mas’uuliyiin kala duwan oo ay ka mid yihiin Agaasimaha Machadka NTTI, Maxamed Axmed Goosaar, wakiillo ka socday Arkaan Leadership and Innovation, madax ka tirsan Shirkadda Isgaarsiinta Hormuud, Salaam Bank, iyo marti-sharaf kale.
Inta uu socdo aqoon-isweydaarsigan, gabdhaha ka qayb-galaya ayaa la siin doonaa casharro la xiriira qaabka Garaad Gacmeedka (AI) loogu adeegsan karo horumarinta bulshada iyo xallinta dhibaatooyinka.
Waxaa sidoo kale barbar socon doona dood-cilmiyeedyo si qoto dheer loogu falanqaynayo caqabadaha iyo fursadaha horyaalla gabdhaha ku dhex jira saaxadda ICT-ga.
Tallaabadan ayaa qayb ka ah dadaallada isdaba-joogga ah ee ay Wasaaradda Isgaarsiinta iyo Teknooloojiyadda, oo uu wakiil ka yahay Machadka NTTI, ku xoojinayso doorka haweenka ee dhinaca teknooloojiyadda, iyadoo la abuurayo fursado waxbarasho iyo kuwo horumarineed.
Ujeeddada ugu weyn ayaa ah in garab istaag joogto ah la siiyo hablaha barta teknooloojiyadda, si ay hormuud uga noqdaan isbeddelka iyo mustaqbalka dhijitaalka ah ee qaranka.
