| Somali
CAALAMKA
3 daqiiqo akhris
Golaha Wasiirrada Soomaaliya oo ansixiyay magacaabista madaxda hay’ado dowladeed iyo siyaasado cusub
Kulanka Golaha Wasiirrada oo uu shir-guddoomiyay RW Xamsa ayaa lagu ansixiyay magacaabista afar mas’uul oo loo xulay inay hoggaamiyaan hay’adaha qaabilsan dakhliga, qaxootiga iyo barakacayaasha, nidaaminta daawooyinka iyo agabka caafimaadka.
Golaha Wasiirrada Soomaaliya oo ansixiyay magacaabista madaxda hay’ado dowladeed iyo siyaasado cusub
Golaha Wasiirrada Soomaaliya oo ansixiyay magacaabista madaxda hay’ado dowladeed iyo siyaasado cusub / OPM Somalia

Golaha Wasiirrada Soomaaliya ayaa ansixiyay magacaabista madaxda hay’ado dowladeed, saddex siyaasadood oo qaran iyo heshiis iskaashi oo lala galay Turkiga, kadib kulan looga hadlay xaaladda amniga, siyaasadda iyo hawlaha xukuumadda.

Kulanka oo uu shir-guddoomiyay Ra’iisul Wasaare Xamsa Cabdi Barre ayaa lagu ansixiyay magacaabista afar mas’uul oo loo xulay inay hoggaamiyaan hay’adaha qaabilsan dakhliga, qaxootiga iyo barakacayaasha, nidaaminta daawooyinka iyo agabka caafimaadka.

Golaha ayaa Agaasimaha Guud ee Hay’adda Dakhliga Qaranka u magacaabay Faysal Maxamed Xaashi, kadib soo jeedin ka timid Wasiirka Maaliyadda.

Waxaa sidoo kale Guddoomiye Ku-xigeenka Hay’adda Qaxootiga iyo Barakacayaasha Qaranka loo magacaabay Khadar Maxamuud Xareed, kadib soojeedin ka timid Wasiirka Arrimaha Gudaha iyo Dib-u-heshiisiinta.

Dhanka caafimaadka, Golaha Wasiirrada ayaa ansixiyay magacaabista Dr. Cabdirisaaq Xirsi Xasan, oo noqday Maareeyaha Hay’adda Daawada iyo Agabka Caafimaadka Qaranka, halka Dr. Faarax Maxamed Sharaawe loo magacaabay Maareeye Ku-xigeenka hay’addaas.

Magacaabista labada mas’uul ayaa lagu saleeyey soo jeedin ka timid Wasiirka Caafimaadka iyo Daryeelka Bulshada.

Sida lagu sheegay warbixinta dowladda, magacaabista mas’uuliyiintan ayaa lagu meel mariyay cod aqlabiyad ah.

Saddex siyaasadood oo qaran iyo heshiis lala galay Turkiga

Golaha Wasiirrada ayaa sidoo kale ansixiyay saddex siyaasadood oo qaran oo la xiriira waxbarashada, daryeelka carruurta iyo arrimaha socdaalka.

Siyaasadaha la meel mariyay ayaa kala ah Siyaasadda Qaran ee Waxbarashada Farsamada iyo Tababarka Xirfadaha, Siyaasadda Qaran ee Kafaalada Carruurta Soomaaliyeed iyo Siyaasadda Qaran ee Nidaaminta Arrimaha Hijrada.

Waxaa intaas dheer heshiis is-afgarad oo u dhexeeya Soomaaliya iyo Turkiga, kaas oo ku saabsan iskaashiga dhinaca adeegyada bulshada.

Ra’iisul Wasaaraha oo ka hadlay amniga iyo doorashooyinka

Ra’iisul Wasaare Xamsa Cabdi Barre ayaa kulanka ka sheegay in xaaladda amniga dalka ay wanaagsan tahay, isagoo xusay in Ciidanka Xoogga Dalka Soomaaliyeed uu awood u leeyahay gudashada waajibaadka loo igmaday.

Wuxuu sidoo kale ka digay in la caadiyeeyo kooxaha argagixisada, isagoo sheegay in arrintaasi ay keeni karto khatar amni.

Dhanka siyaasadda, Ra’iisul Wasaaraha ayaa bogaadiyay doorashooyinkii qof iyo cod ee dalka ka dhacay, kuwaas oo uu ku tilmaamay guul laga gaaray geeddi-socodka dowlad-dhiska Soomaaliya.

RW Xamsa ayaa sheegay in wadahadallada ku saabsan arrimaha doorashooyinka ay weli socdaan, isla markaana ay furan tahay gogosha wadatashiga ee dowladda, isagoo intaas ku daray in go’aannada laga gaarayo arrimaha doorashooyinka la waafajin doono dastuurka iyo shuruucda dalka.

Warbixinno ku saabsan Waqooyi Bari iyo xarunta Halmeel

Intii uu kulanku socday, Xafiiska Ra’iisul Wasaaraha, gaar ahaan qaybta qaabilsan siyaasadda loo dhan yahay, ayaa Golaha u soo bandhigay warbixin ku saabsan safar shaqo oo ay ku tageen Dowlad-goboleedka Waqooyi Bari Soomaaliya.

Warbixinta ayaa lagu faahfaahiyay tababarro iyo taageero farsamo oo la siiyay mas’uuliyiinta maamulkaas, oo ay ku jiraan kuwa heer agaasime ah.

Golaha ayaa sidoo kale warbixin ka dhageystay maamulka Xarunta Adeegyada Mideysan ee Halmeel, oo ka warbixiyay halka ay marayaan diyaar-garowga iyo hawlaha lagu bilaabayo shaqada xarunta cusub.

Kulanka Khamiista, 12-kii Nofeembar, ayaa qayb ka ahaa shirarka toddobaadlaha ah ee Golaha Wasiirrada, kuwaas oo lagu qiimeeyo hawlaha dowladda, laguna ansixiyo siyaasadaha, heshiisyada iyo magacaabista mas’uuliyiinta hay’adaha dowladda.

XIGASHO:TRT SOMALI
Raadi Warar Kale
Wasiirka Deegaanka oo COP31 ku Muujiyay Muhiimadda Waxbarashada Cimilada ee Qorshaha Qaranka
Kenya oo Xasan Cumar Daffa u magacowday Qaadiga Guud ee dalka
Wasiirka cusub ee Gaashaandhigga Jabuuti oo kulankiisii ugu horreeyay la yeeshay hoggaanka ciidamada
Kenya oo casriyeysay xarunteeda la dagaallanka argagixisada
Soomaaliya iyo Jabuuti oo kala saxiixday heshiis lagu xoojinayo tababarka diblumaasiyiinta
Soomaaliya oo Markii Ugu Horreysay Martigelisay Shirka Xoghayeyaasha Joogtada ah ee IGAD-CEWARN
Madasha Garsoorayaasha Soomaaliyeed oo u jawaabtay AJJF, adkeysayna madax-bannaanida garsoorka
Soomaaliya oo ka qayb galaysa Shirka Wasiirrada Caddaaladda ee Dalalka Carabta
Soomaaliya oo Heshay Qoondo Xaj oo Dhan 11,500 oo Xujey ah Sanadka 2027
Aqalka Sare oo Dib-u-eegis ku Sameeyay Wax-ka-beddellada La Soo Jeediyay ee Sharciga Bangiga Dhexe
Soomaaliya iyo IOM oo ka hadlay waafajinta barnaamijyada socdaalka iyo Qorshaha Horumarinta Qaranka
Mandheera: 8 qof oo lagu dilay weerar lala beegtay gaari galbinayay shaqaale dhismo waddo
Soomaaliya iyo Bangiga Saaxilka iyo Saxaraha oo Ka Wada Hadlay Xoojinta Iskaashiga Maaliyadeed
In Ka Badan 2,500 oo Qof oo Ka Barakacay Tuulooyin ku Yaalla Waqooyiga Daarfuur ee Suudaan
Madaxweyne Xasan Sheekh iyo wafdi ballaaran oo Soomaaliya ku matalaya Shirweynaha COP31
Soomaaliya iyo Turkiga oo ka wada hadlay iskaashiga amniga iyo la dagaallanka Al-Shabaab
Soomaaliya oo daraasaynaysa habka ganacsiga dijitaalka ah ee Shiinaha
Al-Burhaan iyo Taliyaha Sirdoonka DR Congo oo ka wada hadlay amniga gobolka
Ciidanka Suudaan oo la wareegay deegaan muhiim ah oo ku yaalla Galbeedka Kordofaan
Soomaaliya oo Ka Qeybgashay Kalfadhigii 22-aad ee Ururka CEN-SAD ee Magaalada Tripoli