Hay’adda Maareynta Musiibooyinka Soomaaliyeed (SoDMA) ayaa Muqdisho ka furtay shir qaran oo looga hadlayo u diyaar-garowga saameynta la filayo ee Super El Niño sannadkan. Shirka oo lala kaashanayo International Medical Corps waxaa ka qaybgalaya hay’adaha dowladda federaalka iyo dowlad-goboleedyada, Rugta Ganacsiga, culimada iyo hay’adaha caalamiga ah iyo kuwa maxalliga ah.
Guddoomiyaha SoDMA, Maxamuud Macallin, ayaa sheegay in xaaladda bani’aadannimo ay u baahan tahay isku-dubbarid iyo wada-shaqeyn degdeg ah si gargaarku waqtigiisa u gaaro bulshooyinka nugul. Saadaallada la soo bandhigay ayaa muujinaya suurtagalnimada Super El Niño iyo roobab xooggan, xilli qaybo badan oo dalka ahi aysan weli ka soo kaban abaarta.
Roobabka xooggan ayaa khatar gaar ah ku ah dhulka aadka u qallalay kaddib xilliyo xiriir ah oo roob yari ah, maadaama biyuhu sababi karaan fatahaado waxyeelleeya guryaha, waddooyinka iyo dhul-beereedka. Soomaaliya waxay xaalad la mid ah tan soo martay dabayaaqadii 2023, markaas oo fatahaadihii El Niño ay barakiciyeen in ka badan hal milyan oo qof, ayna dileen in ka badan boqol qof.
WFP ayaa toddobaadkan sheegtay in lix milyan oo qof, oo ah 31 boqolkiiba dadweynaha Soomaaliya, ay wajahayaan cunto-yari ba’an, halka 1.9 milyan oo carruur ah ay la ildaran yihiin nafaqo-darro ba’an. FEWS NET ayaa sidoo kale sheegtay inay jirto khatar macluul oo ka dhalan karta Bay, Bakool, Gedo, Hiiraan iyo deegaannada xoolo-dhaqatada ee waqooyiga iyo bartamaha dalka dhammaadka 2026.
Dhibaatada hadda jirta waxay ka dhalatay xilliyo xiriir ah oo roobabku yaraayeen. Gu’gii 2025 ayaa lahelin, Deyrtii xigtayna waxay ka mid ahayd xilliyadii ugu qallalnaa ee la diiwaangeliyay, taasoo sababtay khasaaro ballaaran oo xoolaha ah. Gu’gii sannadkan wuxuu keenay roobab dhexdhexaad ah, balse soo kabashada dalka weli ma dhammaystirna.
SoDMA ayaa xoojisay wada-shaqeynta hay’adaha dowladda, culimada iyo saaxiibada caalamiga ah si loo kordhiyo diyaar-garowga. Guddoomiyaha Hay’adda ayaa sidoo kale toddobaadkan la kulmay Xoghayaha Guud ee NRC, Jan Egeland, iyagoo ka wada hadlay abaarta, fatahaadaha iyo khatarta Super El Niño.
Shirka ayaa ilaa hadda diiradda saaray qiimeynta khatarta iyo isku-dubbaridka u diyaar-garowga, balse lama shaacin dhaqaalaha loo baahan yahay. Soomaaliya ayaa wajahaysa cunto-yari ba’an, maalgelinta bani’aadannimo oo sii yaraanaysa iyo khatarta fatahaadaha ka dhalan kara roobabka soo socda.
