Madaxweynaha Soomaaliya, Xasan Sheekh Maxamuud, ayaa Khamiistii waraaqaha aqoonsiga danjirenimo ka guddoomay safiirka cusub ee Turkiga u fadhiya Soomaaliya, Ferhat Alkan, kaas oo si rasmi ah u bilaabay shaqadiisa diblumaasiyadeed ee dalka.
Munaasabad ka dhacday Madaxtooyada Qaranka ayay labada mas'uul kaga wada-hadleen xoojinta xiriirka laba-geesoodka ah iyo sidii loo sii ballaarin lahaa iskaashiga u dhexeeya Soomaaliya iyo Turkiga.
Madaxweynaha ayaa safiirka la wadaagay horumarrada ay dowladdu ka sameysay dhinacyada amniga, dimuqraadiyeynta, iyo dowlad-dhiska, isagoo hoosta ka xarriiqay muhiimadda ay leedahay in labada dal ay sii adkeeyaan iskaashigooda.
Dhankiisa, Safiir Alkan ayaa madaxweynaha gaarsiiyey salaan iyo farriimo uu ka siday madaxda dalkiisa.
Diblumaasigan ayaa xilka kala wareegaya safiirkii hore ee Turkiga u fadhiyey Muqdisho, Alper Aktaş, oo dhowaan soo gabagabeeyey muddadii xil-hayntiisa.
Dabayaaqadii bishii Sebteembar, markii uu la wareegayay waajibaadkiisa cusub, ayuu Alkan sheegay in mudnaanta ugu weyn ee safaaraddu ay noqon doonto sii-horumarinta xiriirka labada waddan.
“Ujeedkeenna ugu weyn waa inaan sii horumarinno xiriirka Turkiga iyo Soomaaliya, annagoo ku dhiseyna is-ixtiraam, kalsooni iyo danaha wadajirka ah... Albaabbada safaaraddeennu mar walba way u furnaan doonaan muwaadiniinteenna Turkiga iyo saaxiibbadeenna Soomaaliyeed, si aan uga faa’iideysanno aragtidooda iyo talooyinkooda qiimaha leh,” ayuu Safiir Alkan ku yiri farriin lagu daabacay bogga rasmiga ah ee Safaaradda.
Cilaaqaadka Muqdisho iyo Ankara
Soomaaliya iyo Turkiga ayaa sannadihii la soo dhaafay si weyn u ballaariyey xiriirkooda, kaas oo gaarsiisan dhinacyada difaaca, amniga, dhaqaalaha, ganacsiga, horumarinta, iyo tamarta.
Xukuumadda Ankara ayaa door weyn ku leh tababarka iyo taageerada ciidamada Soomaaliya, halka dhowaanna ay labada dal si weyn u kordhiyeen iskaashiga sahaminta kheyraadka shidaalka.
Xiriirka labada dal ayaa galay marxalad cusub oo xooggan tan iyo booqashadii taariikhiga ahayd ee uu Madaxweynaha Turkiga Recep Tayyip Erdogan ku yimid Soomaaliya sannadkii 2011-kii.
