Dadka intooda badan ee ku nool 36 dal ayaa qaba aragti aan wanaagsanayn oo ku saabsan Israa’iil, isla markaana aan kalsooni ku qabin Ra’iisul Wasaaraha Israa’iil Benjamin Netanyahu, sida lagu sheegay xog ururin cusub oo ay samaysay Xarunta Pew Research Center.
Xogtaan, oo la daabacay Khamiistii isla markaana la sameeyay intii u dhaxaysay 8-da Febraayo iyo 13-ka Maayo 2026, ayaa lagu ogaaday in celcelis ahaan 67% dadka waaweyn ay Israa’iil u arkaan si aan wanaagsanayn, halka 25% ay u arkaan si wanaagsan.
Aragtiyaha ugu xun ayaa laga diiwaangeliyay dalalka Muslimiintu u badan yihiin ee xog ururintan lagu daray, kuwaas oo ay ka mid yihiin Bangladesh, Indonesia, Malaysia, Pakistan, Turkiga, Daanta Galbeed ee la haysto iyo Bariga Qudus.
Inta badan dalalka, dadka badankoodu waxay sheegeen in ay kalsooni yar ama aanay haba yaraatee wax kalsooni ah ku qabin Netanyahu inuu sameeyo waxa saxda ah ee la xiriira arrimaha caalamka.
Kenya iyo Filibiin ayaa ahaa labada dal ee keliya ee in ka badan kala bar shacabka ay muujiyeen kalsooni ay ku qabaan ra’iisul wasaaraha Israa’iil.
Pew ayaa sheegtay in aragtida aan wanaagsanayn ee Israa’iil ay korodhay 13 ka mid ah 24-ka dal ee xogta isbarbardhigga laga helay tan iyo 2025.
